പെരുമ്പാവൂരിൽ 30 ലക്ഷത്തിന്റെ ഹെറോയിനുമായി 2 പേർ പിടിയിൽ 

പെരുമ്പാവൂർ: മുപ്പതു ലക്ഷം രൂപ വില വരുന്ന ഹെറോയിനുമായി യുവതി ഉൾപ്പെടെ രണ്ട് അന്യസംസ്ഥാനക്കാർ പൊലീസിന്റെ പിടിയിലായി. അസാം നൗഗാവ് സ്വദേശികളായ നൂർ അമീൻ (29), ഹിബ്ജുൻ നഹാർ (25) എന്നിവരെയാണ് രഹസ്യവിവരത്തിന്റെ അടിസ്ഥാനത്തിൽ പോഞ്ഞാശേരിയിൽ നിന്ന് അറസ്റ്റ് ചെയ്തത്.

അസാമിൽ നിന്ന് ട്രെയിനിൽ ആലുവയിലെത്തി ഓട്ടോറിക്ഷയിൽ വരുന്ന വഴിയിലാണ് ഇവർ പിടിയിലായത്. യുവതിയുടെ വസ്ത്രത്തിനുള്ളിൽ ഒളിപ്പിച്ച നിലയിലായിരുന്നു ഹെറോയിൻ. 14 സോപ്പുപെട്ടി ബോക്സുകളിലാണ് ഇത് കൊണ്ടുവന്നത്.

നാഗാലാൻഡിൽ നിന്ന് ഒരു ബോക്സ് 80,000 രൂപ നിരക്കിൽ വാങ്ങി ഇവിടെ ചെറിയ ബോട്ടിലുകളിലാക്കി വിൽപ്പന നടത്തിവരികയായിരുന്നു. ചെറിയ ബോട്ടിലിന് ആയിരം രൂപ മുതൽ 2000 രൂപ വരെയാണ് ഈടാക്കിയിരുന്നത്.

പെരുമ്പാവൂർ എ.എസ്.പി ഹാർദിക് മീണ, ഇൻസ്പെക്ടർ ടി.എം. സൂഫി, എസ്.ഐ പി.എം. റാസിക്, എ.എസ്.ഐമാരായ പി.എ. അബ്ദുൽ മനാഫ്, ശ്രീജ, സീനിയർ സി.പി.ഒമാരായ വർഗീസ് ടി. വേണാട്ട്, ടി.എ. അഫ്സൽ, ബെന്നി ഐസക്, സിബിൻ സണ്ണി, ജിഷ്ണു, അരുൺ എന്നിവരാണ് അന്വേഷണ സംഘത്തിലുണ്ടായിരുന്നത്