നാടിന് കൗതുകമായി 'വേഴാമ്പൽ' വസന്തം

 ജില്ലയിൽ ഇതാദ്യം

കൊല്ലം: ഓണക്കാലത്തെ കൗതുകക്കാഴ്ചയായി​ ചുവന്ന വേഴാമ്പൽ പൂക്കളും (ജേഡ് വൈൻ). കൊട്ടാരക്കര പനവേലി ഗ്രീൻവാലി ഹൗസിലും കൊല്ലം രാമൻകുളങ്ങര കൈരളി നഗറിലെ വിനായക് വീട്ടിലുമാണ് ജി​ല്ലയി​ൽ അപൂർവമായ വേഴാമ്പൽ പൂക്കൾ നി​റഞ്ഞു നി​ൽക്കുന്നത്.

ഫിലിപ്പീൻസിലെ ഉഷ്ണമേഖല മഴക്കാടുകളിൽ സ്വാഭാവികമായി വളരുന്ന ജേഡ് വൈൻ വള്ളിച്ചെടിയുടെ പൂക്കളാണ് ഈ വേഴാമ്പൽ പൂക്കൾ. കടും ചുവപ്പ് പൂക്കൾക്ക് വേഴാമ്പലിന്റെ ചുണ്ടിന് സമാനമായ ആകൃതി ആയതി​നാലാണ് ഇങ്ങനെ പേരുവീണത്. പനവേലിയിലും വാളകം പൊലിക്കോടും ഗ്രീൻവാലി ബൊട്ടാണിക്കൽ ഗാർഡൻ നടത്തുന്ന മുഹമ്മദ് ഷാഫി രണ്ടര വർഷം മുമ്പാണ് പനവേലിയിലെ വീട്ടുമുറ്റത്ത് ജേഡ് വൈൻ തൈ നട്ടത്. ചെടികളുടെ രസതന്ത്രം നന്നായറി​യാവുന്ന ഷാഫി വീടിന്റെ പ്രവേശന കവാടമാകെ പടർത്തി. ചിങ്ങമെത്തിയപ്പോഴേക്കും ചെടി നിറയെ പൂക്കളായി​.

വേഴാമ്പൽ പൂക്കളെ അടുത്തുകാണാൻ ആളുകൾ എത്തുന്നുണ്ട്. കൊല്ലം സിറ്റി ഡി.എച്ച്.ക്യുവിലെ എ.എസ്.ഐ ടി.കണ്ണൻ രണ്ട് വർഷം മുമ്പ് നട്ട ജേഡ് വൈൻ തൈയാണ് ഇപ്പോൾ വീട്ടുമുറ്റത്ത് ചുവപ്പൻ വസന്തമൊരുക്കിയത്. മൂന്നാറിലെ സുഹൃത്താണ് തൈ സമ്മാനി​ച്ചത്.

ചുവപ്പ് മാത്രമല്ല, നീലയും

 സമുദ്രനീല വർണത്തിലും ജേഡ് വൈൻ പൂക്കൾ

 സാധാരണ കണ്ടുവരുന്നത് ചുവപ്പ്

 ദീർഘ വർഷങ്ങളുടെ ആയുസുള്ള ചെടി

 പത്ത് ദിവസത്തോളം പൂവ് കൊഴിയില്ല

 ബീൻസിന്റെ ആകൃതിയിലുള്ള കായ്കളും ഉണ്ടാകും

 വിത്ത് മുളപ്പിച്ചും വള്ളിയിൽ പതിവച്ച് വേര് മുളപ്പിച്ചും തൈകൾ വളർത്താം

 കാര്യമായ പരിചരണം ആവശ്യമില്ല

 രണ്ട് മൂന്ന് വർഷം കൊണ്ട് പൂവിടും

 ഇലപ്പടർപ്പുള്ള ചെടി തണലും കുളിർമയും പകരും