വെർച്വൽ അറസ്റ്റ്:കൊച്ചിയിൽ വീട്ടമ്മയ്ക്ക് നഷ്ടം 2.88 കോടി

കൊച്ചി: വെർച്വൽ അറസ്റ്റ് തട്ടിപ്പിൽ മട്ടാഞ്ചേരി സ്വദേശിയായ വീട്ടമ്മയ്ക്ക് നഷ്ടപ്പെട്ടത് 2.88 കോടി. മട്ടാഞ്ചേരി ആനവാതിൽ ഷേണായ്സ് വളപ്പിൽ വിട്ടിള ഷേണായിയുടെ ഭാര്യ കെ. ഉഷാകുമാരിയെയും (59) വി​ദ്യാർത്ഥി​യായ മകളെയും കേസി​ൽപ്പെടുത്തുമെന്ന് ഭീഷണിപ്പെടുത്തിയാണ് 2,88,10,000രൂപ തട്ടിയെടുത്തത്.

ഉഷാകുമാരി സ്വകാര്യ സ്ഥാപനത്തി​ലെ റി​ട്ട. അക്കൗണ്ടന്റും ഭർത്താവ് വിട്ടിള ഷേണായി സ്വകാര്യബാങ്കിൽ ഉന്നത ഉദ്യോഗസ്ഥനായി​രുന്നു. ​

മുംബയ് തിലക് നഗർ പൊലീസ് സ്റ്റേഷനിലെ സന്തോഷ് റാവു ആണെന്നു പറഞ്ഞ് ഉഷാകുമാരിയുടെ വാട്ട്സ് ആപ്പ് നമ്പറിലേക്ക് ഒരാൾ വീഡിയോ കോൾ വിളിച്ചു. ജെറ്റ് എയർവെയ്‌സുമായി ബന്ധപ്പെട്ട കള്ളപ്പണക്കടത്ത് കേസിലും ക്രി​പ്റ്റോ കറൻസി​ ഇടപാടി​ലും ഉഷാകുമാരി​ക്കെതി​രെ കേസ് രജിസ്റ്റർ ചെയ്തിട്ടുണ്ടെന്ന് ഭീഷണിപ്പെടുത്തി.

ജെറ്റ് എയർവെയ്സി​ന്റെ നരേഷ് ഗോയലി​നെ അറസ്റ്റു ചെയ്തപ്പോൾ കണ്ടെടുത്ത 347 എ.ടി​.എം കാർഡുകളി​ൽ ഒന്ന് ഉഷാകുമാരി​യുടേതാണെന്നും ഉഷാകുമാരിയുടെ അക്കൗണ്ടി​ലേക്ക് ഗോയൽ രണ്ടു കോടി​ മാറ്റി​യി​ട്ടുണ്ടെന്നും തട്ടിപ്പുകാർ പറഞ്ഞു. വീട്ടമ്മയെ വെർച്വൽ അറസ്റ്റ് ചെയ്തെന്ന് ധരിപ്പിച്ച് ഓൺലൈൻ വഴി വ്യാജ കോടതിയിൽ ഹാജരാക്കി. അവിടെ ജഡ്ജിയും വക്കീലും പ്രത്യക്ഷപ്പെട്ടു. സാക്ഷി അഗർവാൾ എന്ന പേരിൽ സാക്ഷിയും ഹാജരായി​. പണം തങ്ങൾ പറയുന്ന അക്കൗണ്ടിലേക്ക് ഇട്ടുകൊടുക്കണമെന്നും തട്ടി​പ്പുമായി​ ബന്ധമി​ല്ലെന്ന് തെളി​യി​ച്ചാൽ തി​രി​കെ ലഭി​ക്കുമെന്നും ജഡ്ജി​ അറി​യി​ച്ചു.

ഉഷാകുമാരി​യുടെയും ഭർത്താവിന്റെയും ബാങ്ക് അക്കൗണ്ടുകളിൽ നിന്ന് ജൂലായ് 14 മുതൽ ആഗസ്റ്റ് 11 വരെ 12 തവണയായി പ്രതികളുടെ അക്കൗണ്ടിലേക്ക് പണം കൈമാറി. 62 ലക്ഷം സ്വർണം പണയം വച്ചും സംഘടി​പ്പി​ച്ചു. ഒടുവിൽ വീട്ടമ്മയെ കേസിൽ നിന്ന് ഒഴിവാക്കിയെന്നും അതിന്റെ ക്ലിയറൻസ് സർട്ടിഫിക്കറ്റ് അടുത്തുള്ള പൊലീസ് സ്റ്റേഷനിൽ നിന്ന് ലഭിക്കുമെന്നും അറിയിച്ചതിനെ തുടർന്ന് ഇവർ വെള്ളി​യാഴ്ച മട്ടാഞ്ചേരി സ്റ്റേഷനിലെത്തിയപ്പോഴാണ് തട്ടിപ്പ് പുറത്തായത്.

തട്ടി​പ്പാണെന്ന് അംഗീകരിക്കാൻ ആദ്യം ദമ്പതികൾ തയ്യാറായി​ല്ല. ഉയർന്ന പൊലീസ് ഉദ്യോഗസ്ഥർ ഇടപെട്ട ശേഷമാണ് പരാതി​ നൽകിയത്.

തട്ടിപ്പുകാർ സ്വയം പരിചയപ്പെടുത്തിയ പേരുകൾ പ്രതിസ്ഥാനത്ത് ചേർത്ത് കേസെടുത്തു.

നവി​മുംബായ് സ്വദേശി​യായ സാക്ഷി അഗർവാളാണ് ഒന്നാം പ്രതി​. സന്തോഷ് റാവു, വിജയ് ഖന്ന, സഞ്ജയ് ഖാൻ, ശിവ സുബ്രഹ്മണ്യം എന്നി​വരാണ് മറ്റു പ്രതി​കളാണ്.