പത്രാധിപർ അനുസ്മരണം ഇന്ന്

തിരുവനന്തപുരം: പത്രാധിപർ കെ. സുകുമാരന്റെ 44-ാമത് ചരമ വാർഷികത്തോടനുബന്ധിച്ച് കേരളകൗമുദി നോൺ ജേർണലിസ്റ്റ്‌‌സ് അസോസിയേഷന്റെ ആഭിമുഖ്യത്തിൽ

ഇന്ന് കേരളകൗമുദി അങ്കണത്തിൽ സംഘടിപ്പിക്കുന്ന അനുസ്മരണ സമ്മേളനം ധനമന്ത്രി കെ.എൻ. ബാലഗോപാൽ ഉദ്ഘാടനം ചെയ്യും.

രാവിലെ 10ന് നടക്കുന്ന സമ്മേളനത്തിൽ മന്ത്രി ജി.ആർ. അനിൽ അദ്ധ്യക്ഷനാകും. മുൻ കേന്ദ്രമന്ത്രിയും ബി.ജെ.പി സംസ്ഥാന പ്രസിഡന്റുമായ രാജീവ് ചന്ദ്രശേഖർ മുഖ്യ പ്രഭാഷണം നടത്തും. യു.ഡി.എഫ് കൺവീനർ അടൂർ പ്രകാശ് എം.പി മുഖ്യാതിഥിയാകും.

സാമൂഹിക, സാംസ്കാരിക, വ്യാവസായിക മേഖലയിലെ മികവിന് രാജധാനി ഗ്രൂപ്പ് ചെയർമാൻ ഡോ.ബിജു രമേശ്, രത്നകല ജൂവലേഴ്സ് ചെയർമാൻ രത്നാകരൻ എന്നിവർക്ക് പത്രാധിപർ പുരസ്കാരം സമ്മാനിക്കും. തിരുവനന്തപുരം ജില്ലയിലെ മികച്ച പ്രാദേശിക ലേഖകനുള്ള പുരസ്കാരം മലയിൻകീഴ് ലേഖകൻ ടി.എസ്.ചന്ദ്രന് നൽകും.

കേരളകൗമുദി നോൺ ജേർണലിസ്റ്റ്‌‌സ് അസോസിയേഷൻ അംഗങ്ങളുടെ മക്കളിൽ ഇക്കഴിഞ്ഞ എസ്.എസ്.എൽ.സി പരീക്ഷയിൽ കൂടുതൽ മാർക്ക് വാങ്ങി വിജയിച്ച വിദ്യാർത്ഥിക്ക് പത്രാധിപർ സ്മാരക അവാർഡും മാനേജ്മെന്റ് നൽകുന്ന ധനസഹായവും, പ്ലസ് ടുവിന് കൂടുതൽ മാർക്ക് വാങ്ങി വിജയിച്ച ക്ഷേമനിധി അംഗങ്ങളുടെ മക്കൾക്കുള്ള അവാർഡും സമ്മേളനത്തിൽ വിതരണം ചെയ്യും. രാവിലെ 9.30ന് പത്രാധിപരുടെ അന്ത്യവിശ്രമ സ്ഥലത്ത് പുഷ്പാർച്ചന നടത്തും.