ഭാര്യയുടെ പ്രസവത്തിനായി ആശുപത്രിയിലെത്തി, വാക്കേറ്റത്തിനിടെ അമ്മാവന്റെ തലയ്ക്കടിച്ച് കൊലപ്പെടുത്തി യുവാവ്

താനെ: ഭാര്യയുടെ പ്രസവത്തിനായി ആശുപത്രിയിലെത്തിയ അമ്മാവനെ കൊലപ്പെടുത്തി യുവാവ്. മുംബയിലെ താനെയിൽ ഇന്നലെ രാത്രിയോടെയാണ് സംഭവം. മുംബയ് ഗോരേഗാവ് സ്വദേശി മാരിയപ്പ രാജു (40) ആണ് മരിച്ചത്. ഗണേഷ് രമേശ് പൂജാരി (26) ആണ് മാരിയപ്പയെ കൊലപ്പെടുത്തിയത്.

ഇരുവരും തമ്മിൽ വാക്കേറ്റം ഉണ്ടായതിനെ തുടർന്ന് പൂജാരി അമ്മാവനായ മാരിയപ്പ രാജുവിന്റെ തല ആശുപത്രിയുടെ പടിയിൽ പിടിച്ച് ഇടിക്കുകയും ക്രൂരമായി മ‌ർദിക്കുകയും ചെയ്തുവെന്ന് പൊലീസ് പറഞ്ഞു. യുവാവ് അമ്മാവന്റെ കോളറിൽ പിടിച്ച് വലിച്ചിഴച്ച് കൊണ്ടുപോകുന്നതിന്റെ സിസിടിവി ദൃശ്യങ്ങൾ പൊലീസിന് ലഭിച്ചിട്ടുണ്ട്. സംഭവത്തെ തുടർന്ന് പൊലീസ് സ്ഥലത്തെത്തി ആശുപത്രിയിൽ വച്ച് തന്നെ യുവാവിനെ കസ്റ്റഡിയിലെടുത്തു.