പത്തനംതിട്ടയിൽ അപകടത്തിൽപെട്ട‌ ഓട്ടോയിലുണ്ടായിരുന്നത് ആറ് കുട്ടികൾ, കാണാതായ നാല്‌വയസുകാരനെ കണ്ടെത്തി

പത്തനംതിട്ട: സ്‌കൂൾ കുട്ടികളുമായി പോയ ഓട്ടോറിക്ഷ നിയന്ത്രണംവിട്ട് തോട്ടിലേക്ക് മറിഞ്ഞുണ്ടായ അപകടത്തിൽ കാണാതായ നാല്‌ വയസുകാരൻ യദു കൃഷ്‌ണനെ കണ്ടെത്തിയെന്ന് വിവരം. അപകടസ്ഥലത്തിന് സമീപം അഗ്നിരക്ഷാ സേനാംഗങ്ങൾ നാട്ടുകാരുമായി ചേർന്ന് നടത്തിയ തെരച്ചിലിലാണ് കുട്ടിയെ കണ്ടെത്തിയത്. കുട്ടിയെ ആശുപത്രിയിലേക്ക് മാറ്റി.

അപകടശേഷം കുട്ടി സുരക്ഷിതമായി വീട്ടിലെത്തി എന്നാണ് ആദ്യം കരുതിയിരുന്നത്. എന്നാൽ കുട്ടി വീട്ടിൽ എത്തിയിട്ടില്ല എന്ന് രക്ഷകർത്താക്കൾ അറിയിച്ചതോടെയാണ് കോന്നി എംഎൽഎ കെ യു ജനേഷ് കുമാറിന്റെ നിർദ്ദേശമനുസരിച്ച് സ്ഥലത്ത് വ്യാപക പരിശോധന ആരംഭിച്ചത്.

അപകടത്തിൽ ശ്രീനാരായണ പബ്ളിക് സ്‌കൂൾ വിദ്യാർത്ഥിനി ആദി ലക്ഷ്‌മി (8) മരിച്ചിരുന്നു. പാമ്പിനെ കണ്ട് ഓട്ടോ വെട്ടിച്ചതോടെയാണ് അപകടം ഉണ്ടായത്. ആകെ അഞ്ച് കുട്ടികളാണ് ഓട്ടോയിലുണ്ടായിരുന്നത് എന്നാണ് ആദ്യം ലഭിച്ച വിവരം. ഇവരെയെല്ലാം പത്തനംതിട്ടയിലെ വിവിധ ആശുപത്രികളിൽ പ്രവേശിപ്പിച്ചിരുന്നു. ഇതിൽ ആദി ലക്ഷ്‌മി മരിച്ചു. ഒരു മണിക്കൂറോളം കഴിഞ്ഞപ്പോഴാണ് യദു കൃഷ്‌ണനെ കാണാതായി എന്ന് വ്യക്തമായത്.