മത്സരസാദ്ധ്യത തള്ളാതെ ജി.സുധാകരൻ

ആലപ്പുഴ: നിയമസഭ തിരഞ്ഞെടുപ്പിൽ മത്സരിക്കാനുള്ള സാദ്ധ്യത തള്ളാതെ മുതിർന്ന സി.പി.എം നേതാവും മുൻമന്ത്രിയുമായ ജി.സുധാകരൻ. 'പാർട്ടി ആവശ്യപ്പെട്ടാൽ മത്സരിക്കും. ആലപ്പുഴയിലെ ഒമ്പത്​ സീറ്റുകളിലെയും പേരുകൾ ജില്ലാകമ്മിറ്റിയാണ്​ ശുപാർശ ചെയ്യേണ്ടത്​. ജയസാദ്ധ്യതയുള്ളവർ മത്സരിക്കണമെന്ന്​ പൊതുജനാഭിപ്രായം വരുമ്പോൾ സ്വഭാവികമായും എന്റെ പേരും വരും. നിന്നാൽ ജയിക്കുമെന്നും എല്ലാവർക്കും ഉറപ്പാണ്. ഒരു കാലത്തും സ്ഥാനാർത്ഥിയാകണമെന്ന് അങ്ങോട്ട് ആവശ്യപ്പെട്ടിട്ടില്ല. പാർട്ടി മത്സരിപ്പിച്ചതും സ്ഥാനങ്ങൾ തന്നതും ആവശ്യം ഉന്നയിച്ചിട്ടല്ല. പാർട്ടി തീരുമാനിക്കുന്നവർ മത്സരിക്കും. മൂന്നാമതും ഇടതുമുന്നണിക്ക് ഭൂരിപക്ഷം ലഭിക്കാൻ സാദ്ധ്യതയുണ്ട് ' - ജി.സുധാകരൻ പുന്നപ്ര പറവൂരിലെ വീട്ടിൽ മാദ്ധ്യമങ്ങളോട് പറഞ്ഞു.