നടത്തത്തിനൊക്കെ ഒരു പരിധിയില്ലേടേയ് 800 കി.മീറ്റർ താണ്ടി കടുവയുടെ സോളോ ട്രിപ്പ്

ഭോപ്പാൽ: ഈ നടത്തം കണ്ടാൽ ആരും ചോദിച്ചുപോകും.. നടത്തത്തിനൊക്കെ ഒരു പരിധിയില്ലേടേയ്.. ഒരു കടുവയുടെ സോളോ ട്രിപ്പ് വിശേഷങ്ങളാണ് ഇപ്പോൾ വൈറൽ. മദ്ധ്യപ്രദേശിൽ നിന്ന് ഒഡീഷ വരെ ഒറ്റ നടത്തമായിരുന്നു. ഒന്നും രണ്ടുമല്ല,​ താണ്ടിയത് 800 കിലോമീറ്റർ.

ദേശീയ കടുവ കണക്കെടുപ്പിനായി സ്ഥാപിച്ച കാമറ ട്രാപ്പുകളിലാണ് ഈ അത്യപൂർവ കടുവയാത്ര പതിഞ്ഞത്.

തീറ്റ തേടിയും ഇണ ചേരുന്നതിനായും പോരിൽ തോറ്റാലുമൊക്കെ കടുവകൾ ദീർഘദൂരം സഞ്ചരിക്കാറുണ്ട്.

എത്തിയത് സിമിലിപാലിൽ

 മദ്ധ്യപ്രദേശിലെ വിദർഭയിൽ ആരംഭിച്ച് ഛത്തീസ്ഗഢ് പിന്നീട്ട് കടുവയെത്തിയത് സിമിലിപാൽ കടുവ സങ്കേതത്തിൽ

 ജനുവരിയിൽ സിമിലിപാൽ കടുവ സങ്കേതത്തിലെത്തിയ നാല്- അഞ്ച് വയസുള്ള ബംഗാൾ കടുവയുടെ പാത

വനംവകുപ്പ് പിന്തുടരുകയായിരുന്നു

 ജനവാസമേഖലയും ദേശീയ പാതകളും താണ്ടി. കടുവകൾ ഇത്രദൂരം യാത്ര ചെയ്ത് മറ്റൊരു വനത്തിലെത്തുന്നത് അപൂർവം

 ഒഡീഷയിലെ മയൂർഭഞ്ച് ജില്ലയിൽ 2,750 ചതുരശ്ര കിലോമീറ്ററിൽ വ്യാപിച്ചു കിടക്കുന്ന രാജ്യത്തെ ഏറ്റവും വലിയ കടുവ സങ്കേതങ്ങളിലൊന്നാണ് സിമിലിപാൽ, 2025 ലെ കണക്കനുസരിച്ച് ഇവിടെ 27 കടുവകളും എട്ട് കുട്ടി കടുവകളുമുണ്ട്

ജോണി ചുറ്റി 300 കിലോമീറ്റർ

2019ൽ ഇണയെ തേടി മഹാരാഷ്ട്രയിൽ നിന്ന് യാത്രതിരിച്ച് തെലങ്കാന ചുറ്റി തിരികെ മഹാരാഷ്ട്രയിലെത്തിയ ജോണി എന്ന കടുവ സഞ്ചരിച്ചത് 300 കിലോമീറ്ററാണ്