ആശങ്ക ഒഴിയാതെ ലോക രാജ്യങ്ങൾ; കൊവിഡ് ബാധിതർ 4.14 കോടി, മരണസംഖ്യ കുതിച്ചുയരുന്നു

ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം 4,14,57,665 ആയി. മരണസംഖ്യയും കുതിച്ചുയരുകയാണ്. ഇതുവരെ 11,35,612 പേരാണ് മരണമടഞ്ഞത്. 3,08,51,948 പേർ രോഗമുക്തി നേടി. ഏറ്റവും കൂടുതൽ രോഗികളുളള അമേരിക്കയിൽ 85 ലക്ഷത്തിലധികം പേർക്കാണ് വൈറസ് ബാധ സ്ഥിരീകരിച്ചത്. 2,27,324 പേർ മരിച്ചു. സുഖം പ്രാപിച്ചവരുടെ എണ്ണം 55 ലക്ഷം പിന്നിട്ടു.

ഇന്ത്യയിൽ കൊവിഡ് ബാധിതരുടെ എണ്ണം എഴുപത്തിയേഴ് ലക്ഷം പിന്നിട്ടു. രോഗമുക്തി നേടിയവരുടെ എണ്ണം അറുപത്തിയെട്ട് ലക്ഷം കടന്നു. ഇതുവരെ 9.6 കോടി കൊവിഡ് പരിശോധനകൾ നടത്തിയതായി കേന്ദ്ര ആരോഗ്യ സെക്രട്ടറി രാജേഷ് ഭൂഷൺ അറിയിച്ചു.രാജ്യത്തെ കൊവിഡ് രോഗമുക്തി നിരക്ക് 88.63 ശതമാനമാണ്. സജീവ കേസുകൾ ഏഴ് ലക്ഷത്തിൽ താഴെ മാത്രമാണ്.

കൊവിഡ് ബാധിതരുടെ എണ്ണത്തിൽ മൂന്നാം സ്ഥാനത്ത് ഇപ്പോഴും ബ്രസീൽ തന്നെയാണ്. രാജ്യത്ത് രോഗം സ്ഥിരീകരിച്ചവരുടെ എണ്ണം അമ്പത്തിമൂന്ന് ലക്ഷം പിന്നിട്ടു. ഒന്നര ലക്ഷത്തിലധികം പേർ മരണമടഞ്ഞു.രോഗമുക്തി നേടിയവരുടെ എണ്ണം 47 ലക്ഷം കടന്നു.