തിരുവനന്തപുരം: കഴക്കൂട്ടത്ത് ബി.ജെ.പി സ്ഥാനാർത്ഥി ശോഭാ സുരേന്ദ്രൻ ചരിത്രം കുറിക്കുമെന്ന് മനോരമ ന്യൂസ് എക്സിറ്റ് പോൾ സർവേ ഫലം. 2.80% കൂടുതൽ വോട്ടോടെ കടകംപളളി സുരേന്ദ്രനെ അട്ടിമറിക്കുമെന്നാണ് പ്രവചനം. യു.ഡി.എഫ് സ്ഥാനാ‌ർത്ഥി ഡോ. എസ്.എസ്. ലാലിന് കഴിഞ്ഞതവണ മൂന്നാം സ്ഥാനത്തെത്തിയ എം.എ. വാഹിദിന്റെ പ്രകടനം പോലും ആവർത്തിക്കാനാകില്ലെന്നും സർവേ പറയുന്നു.

അതേസമയം സംസ്ഥാനത്തെ ബി.ജെ.പിയുടെ ഏക സിറ്റിം​ഗ് സീറ്റായ നേമത്ത് എൽ.ഡി.എഫ് സ്ഥാനാ‌ർത്ഥി വി. ശിവൻകുട്ടി 7.60% അധിക വോട്ടോടെ മണ്ഡലം തിരിച്ചുപിടിക്കുമെന്നും എക്സിറ്റ് പോൾ പറയുന്നു. യു.ഡി.എഫിന് കഴിഞ്ഞ തവണത്തേക്കാൾ 15% വോട്ട് കൂടുമെന്നും ബി.ജെ.പിക്ക് 15% വരെ വോട്ട് കുറയുമെന്നും പ്രവചിക്കുന്നു.

തിരുവനന്തപുരത്തും അട്ടിമറി സൂചനയാണ് തെളിയുന്നത്. വി.എസ്.ശിവകുമാറിനെ ആന്റണി രാജു അട്ടിമറിക്കും. 2.40% അധികം വോട്ട് ആന്റണി രാജു നേടാന്‍ സാദ്ധ്യതയുണ്ട്. നടന്‍ കൃഷ്ണകുമാറിനെ മല്‍സരിപ്പിച്ച ബി.ജെ.പിക്ക് വോട്ടു കുറയുമെന്നും പ്രവചനം വ്യക്തമാക്കുന്നു. എൻ.ഡി.എ 20.20% വോട്ടു മാത്രമാകും നേടുക.