ക്രിയാത്മകമാകണമെന്ന് പ്രതിപക്ഷത്തോട്, അഴിമതി താങ്ങാനോയെന്ന് ഭരണപക്ഷത്തോട്

Tuesday 01 June, 2021 | 12:50 AM

തിരുവനന്തപുരം: പ്രതിപക്ഷം ക്രിയാത്മകമാകണമെന്ന് ഭരണപക്ഷത്തിന്റെ ഉപദേശം. അതിന്റെ പേരിൽ,അഴിമതിയെ താങ്ങാനാകുമോയെന്ന് പ്രതിപക്ഷം.

പതിനഞ്ചാം നിയമസഭയുടെ ഒന്നാം സമ്മേളനത്തിൽ ഗവർണറുടെ നയപ്രഖ്യാപനത്തിന്മേലുള്ള നന്ദിപ്രമേയ ചർച്ചയിലാണ് വാഗ്വാദം.

ആങ്ങള ചത്താലും നാത്തൂന്റെ കണ്ണീര് കണ്ടാൽ മതിയെന്ന സമീപനം പ്രതിപക്ഷത്തിന് പാടില്ലെന്ന് നന്ദിപ്രമേയം അവതരിപ്പിച്ച കെ.കെ. ശൈലജ പറഞ്ഞു. കിഫ്ബി നിയമം പാസാക്കുന്നതിനടക്കം സഹകരിച്ചില്ലേയെന്ന് ഓർമ്മപ്പെടുത്തിയ പ്രതിപക്ഷ അംഗം പി.കെ. ബഷീർ, നിങ്ങൾ കക്കുന്നതും അഴിമതി നടത്തുന്നതും എങ്ങനെ താങ്ങാൻ പറ്റുമെന്ന് ചോദിച്ചു.

 കടകംപള്ളി സുരേന്ദ്രൻ (സി.പി.എം)

കെട്ടിച്ചമച്ച ആരോപണങ്ങളുടെ ചക്രവ്യൂഹത്തെ സമചിത്തതയോടെ പിണറായി നേരിട്ടതിന്റെ വിജയം.

 തിരുവഞ്ചൂർ രാധാകൃഷ്ണൻ (കോൺഗ്രസ്)

കാർപെറ്റ് ബോംബിട്ടപോലെ ആരോഗ്യവകുപ്പിനെ ശിഥിലീകരിച്ചു.

 ഇ. ചന്ദ്രശേഖരൻ (സി.പി.ഐ)

സർക്കാരിന്റെ നയങ്ങൾക്കുള്ള അംഗീകാരമാണ് തുടർഭരണം.

 സി.എച്ച്. കുഞ്ഞമ്പു (സി.പി.എം)

ഒരു തവണ ചക്ക വീണ് മുയൽ ചത്തുവെന്നതുകൊണ്ട് ലോക്‌സഭാ തിരഞ്ഞെടുപ്പിലുണ്ടായത് എപ്പോഴുമുണ്ടാവില്ല.

 മാത്യു ടി. തോമസ് (ജെ.ഡി.എസ്)

മാറിമാറിയുള്ള ഭരണമെന്ന അപകടത്തിൽനിന്ന് കേരളം മുക്തമായി.

 എൻ. ഷംസുദ്ദീൻ (ലീഗ്)

ഒന്നാം പിണറായി സർക്കാരിന്റെ രണ്ടാം പതിപ്പാണിതെങ്കിൽ സമര സജ്ജരായി തങ്ങളുണ്ടാകും.