ഉദയംപേരൂർ എസ്. എൻ. ഡി.പി. സ്കൂളിന് ചരിത്രനേട്ടം
551/551
തൃപ്പൂണിത്തുറ: പതിവ് തെറ്റിക്കാതെ എസ്.എസ്.എൽ.സി പരീക്ഷയിൽ ഉദയംപേരൂർ എസ്.എൻ.ഡി.പി സ്കൂൾ വീണ്ടും നമ്പർ വൺ. ജില്ലയിലെ ഏറ്റവും കൂടുതൽ കുട്ടികളെ പത്താം ക്ളാസ് പരീക്ഷയെഴുതിച്ച സ്കൂളിന് സമ്പൂർണവിജയം. ജില്ലയിൽ ഏറ്റവുധികം ഫുൾ എ പ്ളസ്. പരീക്ഷ എഴുതിയ 551 പേരിൽ 245 പേർക്കും എല്ലാ വിഷയങ്ങൾക്കും ഫുൾ എ പ്ളസ്. ഒരു വിഷയത്തിനു മാത്രമായി എ പ്ലസ് നഷ്ടപ്പെട്ടവരുടെ എണ്ണം 50.
ചരിത്ര നേട്ടം
പിന്നാക്ക പ്രദേശമായ ഉദയംപേരൂരിലെ സാധാരണക്കാരായ കുട്ടികൾ പഠിക്കുന്ന സ്കൂളാണ് വൻകിട സ്കൂളുകളോട് മത്സരിച്ച് അസാധാരണമായ നേട്ടം കൈവരിച്ചത്.
എസ്.എൻ.ഡി.പി യോഗം ഉദയംപേരൂർ ശാഖയുടെ നേതൃത്വത്തിൽ അദ്ധ്യാപകരും അനദ്ധ്യാപകരും പി.ടി.എ ഭാരവാഹികളും നാട്ടുകാരും ഒത്തൊരുമിച്ച് അദ്ധ്വാനിച്ച് കൈവരിക്കുന്നതാണ് ഈ സുവർണ നേട്ടങ്ങൾ. വിദ്യാഭ്യാസം പൊതുസമൂഹത്തിന്റെ പിന്തുണയോടെയെന്ന തത്വത്തിന്റെ പ്രായോഗികത തെളിച്ച പരീക്ഷാഫലം കൂടിയാണിത്.
കൊവിഡുകാലത്ത് ഓൺലൈൻ പഠനം നടപ്പിലാക്കിയപ്പോൾ വിക്ടേഴ്സ് ചാനലിന് ഒപ്പം ഉദയംപേരൂർ സ്കൂളിലെ അദ്ധ്യാപകർ തയ്യാറാക്കിയ ഓൺലൈൻ ക്ളാസുകളും വിജയത്തിന് കരുത്തേകി.
പാവപ്പെട്ട വീട്ടിലെ കുട്ടികൾ പഠനസൗകര്യമില്ലാതെ ബുദ്ധിമുട്ടിലായപ്പോൾ മൊബൈൽ ഫോൺ, ടാബ്, ടെലിവിഷൻ എന്നിവയെല്ലാം ശാഖായോഗത്തിന്റെയും അദ്ധ്യാപകരുടെയും നേതൃത്വത്തിൽ തന്നെ സമാഹരിച്ച് വീടുകളിൽ എത്തിച്ചു പഠനം ഉറപ്പാക്കുകയായിരുന്നു.
കൊവിഡുകാലമായിട്ടും അദ്ധ്യാപകരും ശാഖാ പ്രവർത്തകരും കുട്ടികളുടെ ഭവന സന്ദർശനം നടത്തി വേണ്ട ഇടപെടലുകളും നടത്തിയിരുന്നു. പഠനത്തിൽ പിന്നോക്കം നിൽക്കുന്ന കുട്ടികൾക്ക് വേണ്ടി പ്രത്യേകപരിശീലനങ്ങളും ഏർപ്പാടാക്കി. അതെല്ലാം സമ്പൂർണ വിജയത്തിന് തുണയായി. തീരദേശത്തെ പാവപ്പെട്ട മത്സ്യത്തൊഴിലാളികളുടെയും സാധാരണക്കാരുടെയും മക്കൾ കൂടുതലായി പഠിക്കുന്ന ഈ പൊതു വിദ്യാലയത്തിലെ എല്ലാ നേട്ടങ്ങളുടെയും അടിസ്ഥാനം കൈമെയ് മറന്നുള്ള കൂട്ടായ പ്രവർത്തനം തന്നെ.
പാഠ്യേതര പ്രവർത്തനങ്ങളിലും
മുന്നിൽ
പാഠ്യേതര രംഗത്ത് വർഷങ്ങളായി ജില്ലയിൽ ഒന്നാം സ്ഥാനം ഉദയംപേരൂർ സ്കൂളിനാണ്. ഇതിന്റെ പേരിൽ നിരവധി പുരസ്കാരങ്ങളും അംഗീകാരങ്ങളും ലഭിച്ചിട്ടുണ്ട്.
• സംസ്ഥാനത്തെ ഏറ്റവും മികച്ച പൊതുവിദ്യാലയത്തിനുള്ള അവാർഡ്
• സംസ്ഥാനത്തെ മികച്ച രണ്ടാമത്തെ പി.ടി.എ ക്കുള്ള അവാർഡ് എന്നിവയാണ് ഇവയിൽ പ്രധാനം.
പരിസ്ഥിതി സംരക്ഷണ പ്രവർത്തനം, ലഹരി വിരുദ്ധ പ്രവർത്തനം എന്നിവയെല്ലാം മുന്നിലാണ് സ്കൂൾ.
സ്കൂൾ ലോക്കൽ മാനേജർ മഹാരാജാ ശിവാനന്ദന്റെ നേതൃത്വത്തിൽ
എസ്.എൻ.ഡി.പി യോഗം ഉദയംപേരൂർ ശാഖാ പ്രസിഡന്റ് എൽ.സന്തോഷ്, സെക്രട്ടറി ഡി.ജിനുരാജ്, സ്കൂൾ പ്രിൻസിപ്പൽ ഇ.ജി. ബാബു, ഹെഡ്മിസ്ട്രസ് എൻ.സി. ബീന, പി.ടി.എ പ്രസിഡണ്ട് ആർ.ശ്രീജിത്ത് എന്നിവരാണ് സ്കൂളിന്റെ സകല പ്രവർത്തനങ്ങൾക്കും ചുക്കാൻ പിടിക്കുന്നത്.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |