കോഴിക്കോട്: കാഴ്ചാ പരിമിതികളെ തോൽപ്പിച്ച് കമ്പ്യൂട്ടറിൽ എസ്.എസ്.എൽ.സി പരീക്ഷ സ്വന്തമായെഴുതി മുഴുവൻ എ പ്ലസും നേടിയ മേലാറ്റൂരെ ഫാത്തിമ അൻഷിയെ തേടിയെത്തിയത് ആദരവിന്റെ നിറമുളള കാഴ്ചകൾ. കോഴിക്കോട് പുത്തലത്ത് കണ്ണാശുപത്രിയും മഹാത്മാ ഐ റിസർച്ച് ഫൗണ്ടേഷനും ഐ.എം.എ വനിതാ വിഭാഗം (ഡബ്ള്യു.ഡി.ഒ), തിരുവനന്തപുരം ആസ്ഥാനമായി പ്രവർത്തിക്കുന്ന ചക്ഷുമതിയും ചേർന്നാണ് ഗായിക കൂടിയായ ഫാത്തിമയെ ആദരിച്ചത്. മേലാറ്റൂർ ആർ.എം.ആർ ഹൈസ്കൂൾ വിദ്യാർത്ഥിനിയാണ് ഫാത്തിമ അൻഷി. മഹാത്മാ ഐ റിസർച്ച് ഫൗണ്ടേഷൻ ഡയറക്ടർ ഡോ.സുരേഷ് പുത്തലത്ത് ഡൽഹിയിലെ ഇന്ദർ സിംഗ് നൽകിയ ലാപ്ടോപ്പ് സമ്മാനമായി കൈമാറി. 2020ൽ ചക്ഷുമതിയുടെ എ യെസ് ഫ്രീ സയൻസ് ക്യാമ്പിൽ പങ്കെടുത്തതാണ് തന്റെ ജീവിതത്തിനെയും പഠനത്തെയും നവീന വിവര സാങ്കേതിക വിദ്യയിലൂടെ സ്വാതന്ത്രമാക്കിയതെന്ന് ഫാത്തിമ അൻഷി പറഞ്ഞു. അൻഷിയിലെ സംഗീത വാസന തിരിച്ചറിഞ്ഞ ചക്ഷുമതിയിലെ റാം കമൽ ഭിന്നശേഷി കുട്ടികൾക്കായി നടത്തുന്ന " ദി റോഡ് ടു ഐവി " എന്ന ലോകോത്തര സർവകലാശാലകളിലേക്കുള്ള പ്രവേശന-പഠന പരിപാടിയിലേക്ക് തിരഞ്ഞെടുത്തു. പട്ടുറുമാൽ റിയാലിറ്റി ഷോ വിജയി അൻഷി സംഗീത ലോകത്ത് തന്റെ കഴിവ് തെളിയിക്കാനുള്ള ഒരുക്കത്തിലാണ്. എടപ്പറ്റയിലെ അബ്ദുൾ ബാരി - ഷംല ദമ്പതികളുടെ മകളാണ്. പുത്തലത്ത് കണ്ണാശുപത്രി അസി. മാനേജർ അഖിൽ.പി സ്വാഗതം പറഞ്ഞു. ആശുപത്രി മെഡിക്കൽ ഡയറക്ടർ ഡോ.സുരേഷ് പുത്തലത്ത് ഉദ്ഘാടനം ചെയ്തു. ഐ.എം.എ വനിതാ വിഭാഗം ചെയർപേഴ്സൺ ഡോ.ബാലാ ഗുഹൻ പ്രസംഗിച്ചു ഡോ. ലൂസി പി.തളിയത്ത് നന്ദി പറഞ്ഞു.