ന്യൂഡൽഹി : പെഗസസ് ഫോൺ ചോർത്തൽ വിഷയത്തിൽ മണിക്കൂറുകൾ നീണ്ട ചൂടേറിയ വാദത്തിനാണ് ഇന്നലെ സുപ്രീംകോടതിയിലെ വെർച്വൽ കോടതി മുറി സാക്ഷിയായത്. ഒന്നാം നമ്പർ കോടതിയിൽ 25ാമത്തെ കേസായാണ് പരിഗണിച്ചത്.ചീഫ് ജസ്റ്റിസ് എൻ.വി.രമണ, ജസ്റ്റിസുമാരായ സൂര്യകാന്ത്, ഹിമ കോഹ്ലി എന്നിവരാണ് ബെഞ്ചിലുണ്ടായിരുന്നത്.

കേന്ദ്രവും കോടതിയും തമ്മിൽ

സോളിസിറ്റർ ജനറൽ തുഷാർ മേത്ത: ഞാൻ നേരത്തെ നൽകിയ സത്യവാങ്മൂലത്തിൽ ഫോൺചോർത്തൽ നടന്നിട്ടില്ലെന്ന് വ്യക്തമാക്കിയതാണ്.എന്നാൽ ഹർജിക്കാർ ആവശ്യപ്പെടുന്നത് അന്വേഷണമാണ്. കേന്ദ്ര സമിതി രൂപീകരിച്ച് അന്വേഷിക്കാൻ തയാറാണ്. ദേശസുരക്ഷയെ കരുതി, പെഗസസ് ഉപയോഗിച്ചോ ഇല്ലയോ എന്ന് വ്യക്തമാക്കി സത്യവാങ്മൂലം സമർപ്പിക്കാനാകില്ല.ഉപയോഗിക്കുന്നില്ലെന്ന് വ്യക്തമാക്കിയാൽ ഭീകര സംഘടനകൾ ആ നിലയ്ക്കുള്ള തയാറെടുപ്പുകൾ നടത്തും. ഉണ്ടെന്ന് വ്യക്തമാക്കിയാൽ ഭീകര സംഘടനകൾ പ്രത്യേക മുൻകരുതലുകളെടുക്കും .

ചീഫ് ജസ്റ്റിസ് എൻ.വി.രമണ :കഴിഞ്ഞ തവണ നിങ്ങൾ സത്യവാങ്മൂലം സമർപ്പിക്കാമെന്നല്ലേ പറഞ്ഞത്? അനധികൃതമായി നിങ്ങൾ ഫോൺചോർത്തിയോ?

ജസ്റ്റിസ് സൂര്യകാന്ത്: സാധാരണക്കാരന്റെ വ്യക്തിസ്വാതന്ത്ര്യത്തിലേക്ക് കടന്നുകയറ്റം നടത്തിയോയെന്നാണ് അറിയേണ്ടത്.നിങ്ങൾ സമിതി രൂപീകരിക്കുമോ ഇല്ലയോയെന്നതും ഇവിടെ വിഷയമല്ല. നിലപാട് വ്യക്തമാക്കാൻ സത്യവാങ്മൂലം സമർപ്പിക്കുമോ ഇല്ലയോ എന്നതാണ് ചോദ്യം. പരാതിയുമായി മാദ്ധ്യമപ്രവർത്തകരും ആക്ടിവിസ്റ്റുകളും ഞങ്ങളെ സമീപിച്ചിരിക്കുകയാണ്. അവർക്ക് മറുപടി നൽകിയേ മതിയാകു.

സോളിസിറ്റർ ജനറൽ: ഫോൺചോർത്തിയെന്ന് വ്യക്തികൾ പരാതിപ്പെട്ടാൽ അത് കേന്ദ്രം സമിതി അന്വേഷിക്കാൻ തയാറാണ്.

ചീഫ് ജസ്റ്റിസ് എൻ.വി.രമണ :നിങ്ങൾ പറഞ്ഞത് തന്നെ വീണ്ടും വീണ്ടും ആവർത്തിക്കുകയാണ്.ഞങ്ങൾക്ക് വേണ്ടത് സത്യവാങ്മൂലമാണ്.ഇടക്കാല ഉത്തരവ് 2 - 3 ദിവസത്തിനുള്ളിൽ പുറപ്പെടുവിക്കും. അഭിപ്രായത്തിൽ പുനർചിന്തനമുണ്ടായാൽ കേന്ദ്രത്തിന് കോടതിയെ അറിയിക്കാം.

(ഹർജിക്കാർക്കു വേണ്ടി മറ്റ് അഭിഭാഷകർ വാദം നടത്തി.)