കൊല്ലം: സംസ്ഥാന പൊലീസിനെതിരെ രൂക്ഷ വിമർശനവുമായി സി പി എം കൊല്ലം ജില്ലാ സമ്മേളനം. സംസ്ഥാനത്തെ പൊലീസിന്റെ പ്രവർത്തനങ്ങൾ പോരാ എന്നും പ്രാദേശിക പാർട്ടി നേതാക്കൾക്ക് പോലും സംസ്ഥാനത്തെ പൊലീസ് സ്റ്റേഷനുകളിൽ കയറാൻ സാധിക്കുന്നില്ലെന്നും സമ്മേളനത്തിൽ ആക്ഷേപമുയ‌ർന്നു.

സമ്മേളനത്തിൽ സംസാരിച്ച മുൻ എം എൽ എ അയിഷ പോറ്റി പൊലീസിനെ കടുത്ത ഭാഷയിൽ വിമർശിച്ചു. ഒരു ജനപ്രതിനിധി ആയിരുന്ന തനിക്ക് പോലും പൊലീസിൽ നിന്ന് നീതി നിഷേധിക്കപ്പെടുന്ന അനുഭവം ഉണ്ടായെന്നും അപ്പോൾ സാധാരണ ജനങ്ങളുടെ കാര്യം പറയണോ എന്നും അവർ ചോദിച്ചു.

തുടർഭരണത്തിൽ അഹങ്കരിക്കരുതെന്നും നേതാക്കൾക്ക് മസിലു പിടുത്തം വേണ്ടെന്നും പി ബി അംഗം എസ് രാമചന്ദ്രൻ പിള്ള ജില്ലാ നേതാക്കൾക്ക് താക്കീത് നൽകി. സമ്മേളനത്തില്‍ ചൈനയുടെ നിലപാടുകൾക്കെതിരെയും വിമർശനങ്ങൾ ഉയർന്നു. ചൈന പിന്തുടരുന്നത് മുതലാളിത്തവും ജനാധിപത്യ വിരുദ്ധതയുമാണെന്നും ചൈനയുടെ ഉയർച്ച പാർട്ടി അഭിമാനമായി കാണേണ്ടതില്ലെന്നും സമ്മേളനത്തിൽ അഭിപ്രായം ഉയർന്നു.