കൊടുങ്ങല്ലൂർ: ആത്മീയരംഗത്തും സാമൂഹികരംഗത്തും ശ്രീനാരായണഗുരു നടപ്പിലാക്കിയ നവോത്ഥാനങ്ങൾക്കെതിരെ പ്രവർത്തിക്കുന്നവരെ തിരിച്ചറിയണമെന്ന് എസ്.എൻ.ഡി.പി. വൈദിക യോഗം ജനറൽ സെക്രട്ടറി പി.വി. ഷാജി ശാന്തി. കൊടുങ്ങല്ലൂർ ആല ഗുരുദേവ കല്ല്യാണമണ്ഡപ ഹാളിൽ നടന്ന എസ്.എൻ.ഡി.പി വൈദിക യോഗം തൃശൂർ ജില്ലാ നേതൃത്വ പഠനശിബിരത്തിൽ സംസാരിക്കുകയായിരുന്നു അദ്ദേഹം.

സമൂഹ മാദ്ധ്യമങ്ങളും കോടതി വ്യവഹാരങ്ങളും ഉപയോഗിച്ച് ഗുരുദേവദർശങ്ങളെ അട്ടിമറിക്കുന്നവരെ വൈദികയോഗം നേരിടുമെന്നും അദ്ദേഹം വ്യക്തമാക്കി. എസ്.എൻ.ഡി.പി യോഗവും വൈദിക യോഗവും എന്ന വിഷയത്തിൽ പി.ടി. മന്മഥനും പുരോഹിതധർമ്മം ഗുരുദേവ വീക്ഷണത്തിൽ എന്ന വിഷയത്തിൽ ഡോ. ടി.എസ്. വിജയൻ തന്ത്രികളും ക്ലാസെടുത്തു. സംസ്ഥാന വൈസ് പ്രസിഡന്റ് കൊടുങ്ങല്ലൂർ ബാബു ശാന്തി, വൈദിക യോഗം നേതാക്കളായ മുത്തുശാന്തി, ഷാജി ശർമ്മ, പ്രജിത്ത് ശാന്തി, പി.കെ. വിശ്വൻ, സദാനന്ദൻ ശാന്തി, തുടങ്ങിയവർ നേതൃത്വം നൽകി.