ചെന്നൈ: പതിനഞ്ചുപേർ ചേ‌ർന്ന് രാത്രി ഒരു യുവതിയെ വീട്ടിൽ നിന്ന് തട്ടിക്കൊണ്ടുപോകുന്ന ഞെട്ടിപ്പിക്കുന്ന ദൃശ്യങ്ങൾ സിസിടിവി ക്യാമറയിൽ. തമിഴ്‌നാട്ടിലെ മയിലാടുതുറയിൽ ഇന്നലെയായിരുന്നു സംഭവം നടന്നത്. യുവതിയുടെ വീടിന് സമീപത്തെ ക്യാമറയിലാണ് ദൃശ്യങ്ങൾ പതിഞ്ഞത്. സംഭവത്തിൽ പ്രതികൾ അറസ്റ്റിലാവുകയും യുവതിയെ പൊലീസ് രക്ഷപ്പെടുത്തുകയും ചെയ്തു.

പ്രതികളിലൊരാളായ വിഘ്‌നേശ്വരൻ (34) യുവതിയുമായി സൗഹൃദം സ്ഥാപിക്കുകയും പിന്നാലെ പിന്തുടർന്ന് ശല്യപ്പെടുത്തുകയും ചെയ്തിരുന്നു. ഇതേത്തുടർന്ന് യുവതി പൊലീസിൽ പരാതിപ്പെടുകയും പൊലീസ് വിഘ്‌നേശ്വരനെ വിളിച്ചുവരുത്തി താക്കീത് നൽകുകയും രേഖാമൂലം മൊഴിയെടുത്ത് വിട്ടയക്കുകയും ചെയ്തു.

സംഭവത്തിൽ പ്രകോപിതനായ വിഘ്‌നേശ്വരൻ ജൂലായ് 12ന് യുവതിയെ തട്ടിക്കൊണ്ടുപോകാൻ ശ്രമിക്കുകയും രക്ഷപ്പെട്ട യുവതി പൊലീസിൽ അറിയിക്കുകയും ചെയ്തു. പൊലീസ് ഇയാളെ തിരയുന്നതിനിടെയാണ് ഇന്നലെ ഇയാളും മറ്റ് പതിനാല് പേരും ചേർന്ന് യുവതിയെ വീട്ടിൽ നിന്ന് തട്ടിക്കൊണ്ടുപോയത്. കത്തിയും മറ്റ് മാരകായുധങ്ങളും കാട്ടി വീട്ടുകാരെ ഭീഷണിപ്പെടുത്തിയാണ് യുവതിയെ തട്ടിക്കൊണ്ടുപോവുകയായിരുന്നു.

വിവരമറിഞ്ഞെത്തിയ പൊലീസ് വിഘ്‌നേശ്വരനും സംഘവും സഞ്ചരിച്ചിരുന്നു കാർ ട്രാക്ക് ചെയ്യുകയും യുവതിയെ രക്ഷപ്പെടുത്തുകയുമായിരുന്നു.

A 15 member gang kidnapped a girl in #Mayiladuthurai after she refuses love proposal. #TamilNadu #Crime pic.twitter.com/o1t0ns2x1R

— RAMKUMAR R (@imjournalistRK) August 3, 2022