ഇന്ത്യയിൽ മൂന്നിൽ രണ്ട് പൈലറ്റുമാരും പൈലറ്റിന്റെ സീറ്റിൽ മയങ്ങിപ്പോയതായി സമ്മതിച്ചുവെന്ന ഞെട്ടിക്കുന്ന റിപ്പോർട്ട് പുറത്ത്. അന്തർദേശീയ പൈലറ്റുമാർ ഉൾപ്പെട്ട സേഫ്റ്റി മാറ്റേഴ്സ് ഫൗണ്ടേഷന്റെ പഠനത്തിലാണ് ഈ കണ്ടെത്തൽ. പഠനത്തിൽ പങ്കെടുത്ത പൈലറ്റുമാരിൽ 66% പേരും വിമാനത്തിന്റെ നിയന്ത്രണത്തിലിരിക്കെ സഹ ക്രൂ അംഗത്തെ അറിയിക്കാതെ ഉറങ്ങിപ്പോയതായി സമ്മതിച്ചു.

പ്രധാനമായും രണ്ട് കാരണങ്ങളാലാണ് പൈലറ്റുമാർ ഡ്യൂട്ടിക്കിടയിൽ ഉറങ്ങുന്നത്. പൈലറ്റുമാരുടെ ക്ഷാമവും, കടുത്ത ഡ്യൂട്ടിയുമാണ് കാരണം. ഇന്ത്യയിൽ പൈലറ്റുമാരുടെ ദൗർലഭ്യം ഏറെ നാളായുണ്ട്. പ്രതിവർഷം 1,500 പുതിയ പൈലറ്റുമാരെ വേണമെങ്കിലും കേവലം 200 മുതൽ 300 വരെ പൈലറ്റുമാർ മാത്രമാണ് കൃത്യമായ പരിശീലനം സിദ്ധിച്ച് എത്തുന്നത്. ഇതിനാൽ തന്നെ പൈലറ്റുമാർ അമിതമായി ജോലി ചെയ്യേണ്ടി വരുന്നു. പൈലറ്റുമാരിൽ 54% പേരും പകൽസമയത്ത് ഉറക്കം വരാറുള്ളവരാണെന്നും പഠനം പറയുന്നു. 1959 നും 2016 നും ഇടയിൽ ലോകമെമ്പാടുമുള്ള വാണിജ്യ വിമാന അപകടങ്ങൾ വ്യക്തമാക്കുന്നത് 48% വലിയ അപകടങ്ങളും സംഭവിക്കുന്നത് പറക്കലിന്റെ അവസാന ഘട്ടത്തിലും ലാൻഡിംഗിലുമാണ്.