നഷ്ടമായത് കുടുംബത്തിലെ അംഗം: വെള്ളാപ്പള്ളി നടേശൻ

തലശ്ശേരി: എന്റെ കുടുംബത്തിലെ ഒരംഗം നഷ്ടപ്പെട്ടതിന്റെ തീവ്രമായ ദുഃഖമാണ് അനുഭവിക്കുന്നതെന്ന് കോടിയേരിയുടെ ഭൗതികശരീരത്തിൽ അന്ത്യാഞ്ജലിയർപ്പിക്കാൻ തലശ്ശേരിയിലെത്തിയ എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. അത്രമേൽ ആത്മബന്ധമാണ് കോടിയേരിയുമായുണ്ടായിരുന്നത്. കേരള രാഷ്ട്രീയത്തിൽ ശത്രുക്കളില്ലാത്ത നേതാവാണ് കോടിയേരിയെന്ന് പറഞ്ഞാൽ തെറ്റാവില്ല. സ്‌നേഹത്തോടെ പുഞ്ചിരിയോടെ, നിഷ്‌ക്കളങ്കമായ മനസ്സുമായി എല്ലാവരേയും ഒരു പോലെ സ്വീകരിക്കുന്ന അദ്ദേഹം ഐശ്വര്യത്തിന്റെയും സന്തോഷത്തിന്റെയും ആൾരൂപമാണ്. എതിർശബ്ദങ്ങളെ സ്‌നേഹം കൊണ്ട് കീഴ്‌പ്പെടുത്താനാവുമെന്ന് തന്റെ ജീവിതം കൊണ്ട് തെളിയിച്ച ജനനേതാവാണ് കോടിയേരിയെന്ന് എസ്.എൻ.ഡി.പി യോഗം ദേവസ്വം സെക്രട്ടറി അരയാക്കണ്ടി സന്തോഷ് പറഞ്ഞു. പത്നി പ്രീതി നടേശനും മകൻ തുഷാർ വെള്ളാപ്പള്ളിയും വെള്ളാപ്പള്ളി നടേശനൊപ്പം തലശ്ശേരിയിലെത്തിയിരുന്നു.