മൂന്ന് തവണ ബലാത്സംഗം ചെയ്‌തു; നടനും അവതാരകനുമായ ഗോവിന്ദൻകുട്ടിക്കെതിരെ പരാതിയുമായി മറ്റൊരു യുവതി

കൊച്ചി: നടനും അവതാരകനുമായ അടൂർ കടമ്പനാട് നെല്ലിമുകൾ പ്ലാന്തോട്ടത്തിൽ ഗോവിന്ദൻകുട്ടി (42)യ്‌ക്കെതിരെ വീണ്ടും പീഡന പരാതി. 2021ലും 2022ലുമായി മൂന്ന് തവണ ബലാത്സംഗം ചെയ്‌തെന്നാരോപിച്ചാണ് യുവതി എറണാകുളം നോർത്ത് പൊലീസിൽ പരാതി നൽകിയത്.

കഴിഞ്ഞമാസം നടിയും മോഡലുമായ മറ്റൊരു യുവതിയും ഗോവിന്ദൻകുട്ടിക്കെതിരെ പീഡന പരാതി നൽകിയിരുന്നു. വിവാഹ വാഗ്ദാനം നൽകി എറണാകുളത്തെ വാടകവീട്ടിലും സുഹൃത്തിന്റെ വില്ലയിലും കാറിലുംവച്ച് പലതവണ പീഡിപ്പിച്ചെന്നായിരുന്നു പരാതി.

യൂട്യൂബ് ചാനലിലേക്ക് ടോക് ഷോ ചെയ്യാൻ പോയപ്പോഴാണ് പ്രതിയെ പരാതിക്കാരി പരിചയപ്പെട്ടത്. തുടർന്ന് വിവാഹ വാഗ്ദാനം നൽകി ലൈംഗികമായി പീഡിപ്പിക്കുകയായിരുന്നു. അതിനുശേഷം വിവാഹത്തെക്കുറിച്ച് പറഞ്ഞപ്പോൾ ഇയാൾ മർദിച്ചെന്നും പരാതിയിൽ പറയുന്നു. നവംബർ ഇരുപത്തിനാലിനായിരുന്നു നടി നോർത്ത് പൊലീസിൽ പരാതി നൽകിയത്. ഇതിൽ കേസെടുത്ത് അന്വേഷണം നടക്കുന്നതിനിടയിലാണ് നടനെതിരെ സമാനരീതിയിൽ വീണ്ടും പരാതി വന്നത്.