കൊച്ചി: വില്പനമാന്ദ്യം,​ മൈക്രോചിപ്പ് ക്ഷാമം,​ ഉത്‌പാദനക്കുറവ്,​ വിലവർദ്ധന,​ പലിശനിരക്ക് വർദ്ധന,​ സാമ്പത്തികഞെരുക്കം,​ വിതരണശൃംഖലയിലെ തടസം എന്നിങ്ങനെ നിരവധി വെല്ലുവിളികളെയാണ് കൊവിഡാനന്തരം ഇന്ത്യൻ വാഹനവിപണി നേരിട്ടത്.
● എന്നാൽ,​ ഇവയെല്ലാം തട്ടിയകറ്റി 2022ൽ എക്കാലത്തെയും ഉയർന്ന വില്പനക്കണക്ക് കുറിച്ചിടാൻ ആഭ്യന്തര വാഹന റീട്ടെയിൽ വിപണിക്ക് കഴിഞ്ഞു. ഇപ്പോഴിതാ,​ പുതുവർഷത്തിലെ ആദ്യമാസത്തിലും നേട്ടക്കുതിപ്പ് തുടരുകയാണ് വിപണി.
● ജനുവരിയിൽ എല്ലാവിഭാഗം വാഹനശ്രേണികളും മികച്ച നേട്ടം കുറിച്ചെന്ന് ഡീലർമാരുടെ കൂട്ടായ്‌മയായ ഫെഡറേഷൻ ഒഫ് ഓട്ടോമൊബൈൽ ഡീലേഴ്‌സ് അസോസിയേഷൻസ് (ഫാഡ)​ വ്യക്തമാക്കുന്നു.
● എല്ലാ ശ്രേണി കളിലുമായി 18.26 ലക്ഷം പുതിയവാഹനങ്ങളാണ് കഴിഞ്ഞമാസം നിരത്തിലെത്തിയത്. 2022 ജനുവരിയിലെ 16.08 ലക്ഷം യൂണിറ്റുകളേക്കാൾ 13.56 ശതമാനം അധികമാണിത്.
● അതേസമയം,​ കൊവിഡിന് മുമ്പത്തെ,​ അതായത് 2020 ജനുവരിയെ അപേക്ഷിച്ച് മൊത്തം വാഹനവില്പന ഇപ്പോഴും 8 ശതമാനം കുറവാണ്. ഗ്രാമീണസമ്പദ്‌വ്യവസ്ഥ കൂടി കരകയറിയാൽ ഈ പ്രതിസന്ധിയും മറികടക്കാനാകുമെന്ന് ഫാഡ വിലയിരുത്തുന്നു.

കേരളത്തിൽ ഓട്ടോറിക്ഷ

കേരളത്തിൽ കഴിഞ്ഞമാസം റീട്ടെയിൽ വാഹനവിപണി പോയത് പിന്നോട്ട്. ആകെ വളർച്ചകുറിച്ചത് ഓട്ടോറിക്ഷാ വിപണിമാത്രം. ടൂവീലർ വില്പന 6.46 ശതമാനം,​ വാണിജ്യവാഹനം 6.05 ശതമാനം,​ കാറും വാനും എസ്.യു.വിയും ഉൾപ്പെടുന്ന പാസഞ്ചർ വാഹന (പി.വി)​ വിഭാഗം 6.56 ശതമാനം എന്നിങ്ങനെ നഷ്‌ടം കുറിച്ചു.
● 38.51 ശതമാനമാണ് ട്രാക്‌ടർ വില്പന രേഖപ്പെടുത്തിയ ഇടിവ്. ത്രീവീലർ‌ വില്പന 53.58 ശതമാനം ഉയർന്നു. എല്ലാ ശ്രേണികളിലുമായി ആകെ ഇടിവ് 5.21 ശതമാനം.
● 42,​746 ടൂവീല റുകളാണ് കഴിഞ്ഞമാസം പുതുതായി കേരളത്തിന്റെ നിരത്തിലെത്തിയത്. 2022 ജനുവരിയിൽ വില്പന 45,697 എണ്ണമായിരുന്നു. വാണിജ്യവാഹന വില്പന 2,362ൽ നിന്ന് 2,​219ലേക്കും ട്രാക്‌ടർ വില്പന 174ൽ നിന്ന് 107ലേക്കും ഇടിഞ്ഞു.
● 16,​357 കാറുകളാണ് പുതുതായി വിറ്റഴിഞ്ഞത്. 2022 ജനുവരിയിൽ കേരളീയർ 17,​506 പുത്തൻ കാറുകൾ റോഡിലിറക്കിയിരുന്നു. എല്ലാ ശ്രേണികളിലുമായി ആകെ വിറ്റഴിഞ്ഞ വണ്ടികൾ 67,247ൽ നിന്ന് 63,​745 ആയും കുറഞ്ഞു.

മാരുതിയാണ് താരം

ജനുവരിയിലെ മൊത്തം ദേശീയതല മൊത്തവില്പന കണക്കെടുത്താൽ മാരുതി സുസുക്കി തന്നെയാണ് പാസഞ്ചർ വാഹനങ്ങളിൽ മുന്നിട്ടുനിൽക്കുന്നത്.
● ആകെ 2,​98,​093 പുത്തൻ വാഹനങ്ങൾ കഴിഞ്ഞമാസം ഫാക്‌ടറിയിൽ നിന്ന് ഡീലർഷിപ്പുകളിലേക്കെത്തി. 2022 ജനുവരിയിൽ 2,54,287 യൂണിറ്റുകളായിരുന്നു. കഴിഞ്ഞമാസത്തെ മൊത്തം മൊത്തവില്പനയിൽ (ഹോൾസെയിൽ)​ ഒരുലക്ഷത്തിലധികവും മാരുതി സുസുക്കിയുടെ മോഡലുകളായിരുന്നുവെന്ന് നിർമ്മാതാക്കളുടെ കൂട്ടായ്‌മയായ സൊസൈറ്റി ഒഫ് ഇന്ത്യൻ ഓട്ടോമൊബൈൽ മാനുഫാക്‌ചറേഴ്‌സ് (സിയാം)​ വ്യക്തമാക്കി.
● 22,574 യൂണിറ്റ് വില്പനയുമായി ഹ്യുണ്ടായിയാണ് രണ്ടാംസ്ഥാനത്ത്. ഹാച്ച്ബാക്ക് ശ്രേണിയിൽ ഏറ്റവുമധികം വില്പനനേടിയത് മാരുതി സുസുക്കി ഓൾട്ടോയും എസ്-പ്രസോയുമാണ്. റെനോ ക്വിഡ് ആണ് ഇവയ്ക്ക് തൊട്ടുപിന്നാ ലെയുള്ളത്.
● വാഹന റീട്ടെയിൽ വില്പനയിൽ ജനുവരിയിലും മുന്നിൽ മാരുതി തന്നെ. ആകെ കാറുകളിൽ 44.10 ശതമാന വുംമാരുതിയുടെ മോഡലുകളാണ്.
● 13.46 ശതമാന വുമായി ഹ്യുണ്ടായ് രണ്ടാമതും 13.24 ശതമാനവുമായി ടാറ്റാ മോട്ടോഴ്‌സ് മൂന്നാമതും 9.91 ശതമാനവുമായി മഹീന്ദ്ര ആൻഡ് മഹീന്ദ്ര നാലാമതുമാണ്. അഞ്ചാംസ്ഥാനത്ത് 5.67 ശതമാനവുമായി കിയയാണ്.