സെമി ടിക്കറ്റ് തേടി ബ്ലാസ്റ്റേഴ്സ് ബംഗളൂരുവിനെതിരെ

ബംഗളൂരു: ഇന്ത്യൻ സൂപ്പ‌ർ ലീഗിലെ സെമി ലക്ഷ്യം വച്ചുള്ള പ്ലേ ഓഫ് പോരാട്ടത്തിൽ കേരള ബ്ലാസ്റ്റേഴ്സ് ഇന്ന് ബംഗളൂരുവിനെ നേരിടും. ബംഗളൂരുവിന്റെ തട്ടകമായ ശ്രീകണഠീരവ സ്‌റ്റേഡിയത്തിൽ രാത്രി 7.30 മുതലാണ് മത്സരം. ജയിക്കുന്ന ടീം 7ന് നടക്കുന്ന ആദ്യ പാദസെമിയിൽ മുംബയ് സിറ്റി എഫ്.സിയെ നേരിടും.

ലീഗ് ഘട്ടത്തിൽ ബ്ലാസ്റ്റേഴ്സ് അഞ്ചാമതും ബംഗളൂരു നാലാമതുമാണ് ഫിനിഷ് ചെയ്തത്. നാളെ നടതക്കുന്ന മറ്റൊരു പ്ലേ ഓഫിൽ മൂന്നാം സ്ഥാനത്ത് ഫിനിഷ് ചെയ്ത മോഹൻ ബഗാൻ സ്വന്തം മൈതാനത്ത് ആറാം സ്ഥാനക്കാരായ ഒഡിഷയെ നേരിടും. മൂന്നും നാലും സ്ഥാനക്കാരുടെ ഹോം ഗ്രൗണ്ടിലാണ് പ്ലേ ഓഫ് മത്സരങ്ങൾ നടക്കുന്നത്. ലീഗിൽ ഒന്നും രണ്ടും സ്ഥാനത്ത് ഫിനിഷ് ചെയ്ത മുംബയ് സിറ്റി എഫ്.സിയും ഹൈദരാബാദും നേരിട്ട് സെമിയിൽ എത്തിയിരുന്നു.

ബംഗളൂരുവിനോടുൾപ്പെടെ ലീഗിൽ അവസാനം കളിച്ച മൂന്ന് മത്സരങ്ങളും തോറ്ര നിലവിലെ റണ്ണറപ്പുകളായ ബ്ലാസ്റ്റേഴ്സ് പ്ലേ ഓഫിൽ പിഴവുകൾ ആവർത്തിക്കാതിരിക്കാൻ ഉറച്ചാണ് കളത്തിലിറങ്ങുന്നത്. ഒരുഘട്ടത്തിൽ മൂന്നാമതായിരുന്ന ബ്ലാസ്റ്റേഴ്സ് അവസാന മത്സരങ്ങളിലെ തോൽവികൾ കാരണമാണ് പോയിന്റ് ടേബിളിൽ താഴേക്ക് ഇറങ്ങിയതും ഹോം ഗ്രൗണ്ടിൽ പ്ലേ ഓഫ് കളിക്കാനുള്ള ആനുകൂല്യം നഷ്ടമാക്കിയത്. മറുവശത്ത് അവസാനം കളിച്ച 8 മത്സരങ്ങളും ജയിച്ചാണ് ബംഗളൂരു പ്ലേ ഓഫ് ഉറപ്പിച്ചത്. ഈ സീസണിൽ മുഖാമുഖം വന്ന മത്സരങ്ങളിൽ ഇരുടീമും സ്വന്തം മൈതാനങ്ങളിൽ ജയം നേടിയിരുന്നു. ഇതുവരെ ഐ.എസ്.എല്ലിൽ ഇരുടീമും ആകെ 12 തവണ മുഖാമുഖം വന്നിട്ടുണ്ട്. ഇതിൽ 7 തവണ ബംഗളൂരു ജയിച്ചപ്പോൾ ബ്ലാസ്റ്റേഴ്സിന് ജയിക്കാനായത് 3 തവണമാത്രമാണ്.