കൊല്ലം: കൊല്ലം എസ്.എൻ കോളേജിന് നാക് എ പ്ലസ് ഗ്രേഡ് അംഗീകാരം. കഴിഞ്ഞമാസം 25, 26 തീയതികളിൽ നാക് വിദഗ്ദ്ധ സംഘം കോളേജിലെത്തി നടത്തിയ പരിശോധനയിലാണ് കോളേജിന് പൊന്നിൻ തിളക്കമുള്ള അംഗീകാരം ലഭിച്ചത്.
കഴിഞ്ഞ അഞ്ചുവർഷത്തെ കോളേജിന്റെ പ്രവർത്തനങ്ങളാണ് നാക് സംഘം വിലയിരുത്തിയത്. 3.45 പോയിന്റോടെയാണ് കോളേജ് നാക് എ പ്ലസ് ഗ്രേഡ് സ്വന്തമാക്കിയത്. 0.05 പോയിന്റ് കൂടി ലഭിച്ചിരുന്നെങ്കിൽ എ പ്ലസ് പ്ലസ് ഗ്രേഡ് ലഭിക്കുമായിരുന്നു. കഴിഞ്ഞ തവണ 3.01 പോയിന്റ് നേടി എ ഗ്രേഡ് ലഭിച്ചിരുന്നു. അതിൽ നിന്നാണ് എ പ്ലസ് ഗ്രേഡിലേക്ക് ഇപ്പോൾ ഉയർന്നത്.
ഏഴ് ഘടകങ്ങൾ അടിസ്ഥാനമാക്കിയായിരുന്നു നാക് സംഘത്തിന്റെ പരിശോധന. അതിൽ കരിക്കുലം വീക്ഷണം, വിദ്യാർത്ഥികൾക്കുള്ള പിന്തുണ, പുരോഗതി എന്നീ രണ്ട് വിഭാഗങ്ങളിൽ നാലിൽ നാല് മാർക്കും കോളേജിന് ലഭിച്ചു. കോളേജിലെ പാഠ്യേതര പ്രവർത്തനങ്ങളും കാമ്പസ് റിക്രൂട്ട്മെന്റിലൂടെ അവസാന വർഷ വിദ്യാർത്ഥികൾക്ക് തൊഴിലവസരങ്ങൾ ലഭ്യമാക്കിയതും മുഴുവൻ മാർക്കും കിട്ടാൻ സഹായകരമായി. ഗവേഷണ പ്രവർത്തനങ്ങൾ, അടിസ്ഥാന സൗകര്യങ്ങൾ, കോളേജ് ഭരണം, പുതിയ മാതൃക തീർക്കൽ എന്നീ ഘടകങ്ങളിലും കോളേജിന് മികച്ച പോയിന്റ് ലഭിച്ചു. കോളേജിലെ അത്യാധുനിക ലാബ് സൗകര്യം, പതിനായിരക്കണക്കിന് പുസ്തകങ്ങളുള്ള ലൈബ്രറികൾ, പി.എച്ച്.ഡിയുള്ള തൊണ്ണൂറോളം അദ്ധ്യാപകർ, മികച്ച അടിസ്ഥാന സൗകര്യം, മെച്ചപ്പെട്ട അക്കാഡമിക നിലവാരം എന്നിവയും നേട്ടത്തിന് സഹായകരമായി.
സാങ്കേതിക വിദ്യയിലും മാതൃക
കോളേജ് ലൈബ്രറിയിൽ സാങ്കേതിക വിദ്യ പ്രയോജനപ്പെടുത്തി സ്ഥാപിച്ചിട്ടുള്ള ഡി സ്പേസ് എന്ന ബ്രൗസിംഗ് സെന്റർ ഉന്നത വിദ്യാഭ്യാസ സ്ഥാപനങ്ങൾക്കാകെ മാതൃകയാണ്. 42 കമ്പ്യൂട്ടറുകളുള്ള ഈ ബ്രൗസിംഗ് സെന്ററിൽ ഇന്റർനെറ്റിൽ നിന്ന് വിവരങ്ങൾ തെരയുന്നതിനൊപ്പം ഉത്തരങ്ങൾ സഹിതമുള്ള മുൻകാല പരീക്ഷ പേപ്പറുകൾ, നോട്ടുകൾ സഹിതമുള്ള സിലബസ് തുടങ്ങിയവ ലഭിക്കും.
മാനേജ്മെന്റിന്റെ പിന്തുണയിൽ
കുതിച്ചുചാട്ടം
മാനേജ്മെന്റിന്റെ ശക്തമായ പിന്തുണയും കോളേജിന്റെ കുതിച്ചുചാട്ടത്തിന് സഹായകരമായി. മികച്ച നേട്ടം സ്വന്തമാക്കാൻ അത്മാർത്ഥമായി പ്രവർത്തിച്ച പ്രിൻസിപ്പൽ അടക്കമുള്ള അദ്ധ്യാപകരെയും അനദ്ധ്യാപകരെയും അനുമോദിക്കാൻ കോളേജ് മാനേജർ കൂടിയായ എസ്.എൻ ട്രസ്റ്റ് സെക്രട്ടറിയും യോഗം ജനറൽ സെക്രട്ടറിയുമായ വെള്ളാപ്പള്ളി നടേശൻ നാളെ കോളേജിൽ നേരിട്ടെത്തും.
രാപ്പകൽ നീണ്ട അദ്ധ്വാനത്തിലൂടെയാണ് നാക് എ പ്ലസ് ഗ്രേഡ് ലഭിച്ചത്. നാക് പരിശോധനയുടെ അടുത്തഘട്ടം പ്രൊഫഷണൽ സൈക്കിളാണ്. ഇപ്പോഴത്തെ നേട്ടം അടുത്ത സൈക്കിളിലെ മികച്ച പ്രകടനത്തിന് സഹായകരമാകും.
ഡോ. നിഷ.ജെ തറയിൽ
കോളേജ് പ്രിൻസിപ്പൽ
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |