ബസിനുള്ളിൽ യുവ നടിക്കുനേരെ നഗ്നതാ പ്രദർശനം: കോഴിക്കോട് സ്വദേശി സവാദ് റിമാൻഡിൽ, അനുഭവം തുറന്നുപറഞ്ഞ് വീഡിയോ

കൊച്ചി: കെ എസ് ആർ ടി സി ബസിൽ യുവനടിയും മോഡലുമായ യുവതിക്ക് നേരെ നഗ്നതാ പ്രദർശനം നടത്തിയ ഇരുപത്തേഴുകാരൻ റിമാൻഡിൽ. കോഴിക്കോട് കായക്കൊടി കാവിൽ സവാദിനെ പതിനാല് ദിവസത്തേക്ക് റിമാൻഡ് ചെയ്തത്. ബസിൽ നിന്ന് ഇറങ്ങിയോടാൻ ശ്രമിച്ച സവാദിനെ നാട്ടുകാരും യാത്രക്കാരും ചേർന്നാണ് പിടികൂടി പൊലീസിന് കൈമാറിയത്.

അതിനിടെ, തനിക്കുണ്ടായ ദുരനുഭവം വെളിപ്പെടുത്തി തൃശൂർ സ്വദേശിനിയും സിനിമാ പ്രവർത്തകയുമായ നന്ദിത ശങ്കര സോഷ്യൽ മീഡിയിൽ പങ്കുവച്ച വിഡിയോ ചർച്ചയാവുകയാണ്. ഇതുവരെ പന്ത്രണ്ട് ലക്ഷത്തിലധികം പേരാണ് വീഡിയോ കണ്ടത്. നിരവധി പേർ നന്ദിതയെ പിന്തുണയ്ക്കകയും സമാന അനുഭവങ്ങൾ പങ്കുവയ്ക്കുകയുംചെയ്തിട്ടുണ്ട്.

ഇക്കഴിഞ്ഞ ചൊവ്വാഴ്ചയാണ് നന്ദിതയ്ക്ക് ദുരനുഭവം നേരിടേണ്ടിവന്നത്. സിനിമാ ചിത്രീകരണത്തിനായി എറണാകുളത്തേക്ക് പോവുകയായിരുന്നു നന്ദിത. സവാദ് അങ്കമാലിയിൽ നിന്നാണ് ഈ ബസിൽ കയറിയത്.മൂന്ന് പേർക്ക് ഇരിക്കാവുന്ന സ്ത്രീകൾക്ക് മുൻഗണനയുള്ള സീറ്റിൽ നന്ദിതയ്ക്കും മറ്റൊരു യുവതിക്കുമിടയിലാണ് സവാദ് ഇരുന്നത്. ബസെടുത്തതോടെ അയാൾ തന്റെ ശരീരത്തിൽ ഉരസുകയും നഗ്നത പ്രദർശിപ്പിക്കുകയും ലൈംഗിക ചേഷ്ട കാണിക്കുകയുമായിരുന്നെന്ന് നടി സോഷ്യൽ മീഡിയയിൽ പങ്കുവച്ച വീഡിയോയിൽ പറയുന്നു.

View this post on Instagram

A post shared by Nandita Sankara (@mastaanii_)

'ഞാൻ ജനലിനടുത്താണ് ഇരുന്നത്. അയാൾ എന്നോട് എവിടേക്കാ പോകുന്നത്, ബ്ലോക്കുണ്ടാകുമോ എന്നൊക്കെ ചോദിച്ചു. അതിനെല്ലാം മറുപടിയും കൊടുത്തു. കുറച്ച് കഴിഞ്ഞപ്പോൾ അയാളുടെ കൈ എന്റെ ഇടുപ്പിൽ ഉരസുന്നതായി തോന്നി. നോക്കിയപ്പോൾ ശരിയാണ്, മറ്റേ കൈ അയാളുടെ സ്വകാര്യഭാഗത്തും ഉരസുന്നു. എനിക്ക് വല്ലാത്ത പ്രയാസം തോന്നി. തുടർന്ന് ബസിന്റെ വിൻഡോ ഉയർത്തി, അയാളിൽ നിന്ന് അകലം പാലിച്ച് പുറത്തേക്ക് നോക്കിയിരുന്നു. കുറച്ച് കഴിഞ്ഞ് നോക്കിയപ്പോൾ അയാൾ സിബ് അഴിച്ച് സ്വകാര്യാവയവം പുറത്തെടുത്ത് സ്വയം ഭോഗം ചെയ്യുന്നതാണ് കണ്ടത്. എന്തുചെയ്യണമെന്നറിയാതെ, ഞാൻ ഫോണിൽ വീഡിയോയെടുത്തു. എന്താണ് നിങ്ങളുടെ പ്രശ്നമെന്ന് അയാളോട് ചോദിച്ചു.

ഒന്നുമറിയാത്ത ഭാവത്തിൽ അയാൾ സിബ് വലിച്ചിട്ട് എഴുന്നേറ്റുപോയി. ഞാൻ ഒച്ചയുണ്ടാക്കി, നടന്ന സംഭവം പറഞ്ഞപ്പോൾ പരാതിയുണ്ടോയെന്ന് കണ്ടക്ടർ ചോദിച്ചു. ഉണ്ടെന്ന് ഞാൻ പറഞ്ഞു. സിബ് അഴിച്ചിട്ടില്ലെന്നുംവെറുതെയിരിക്കുകയായിരുന്നുവെന്നുമാണ് അയാൾ പറഞ്ഞത്. ബസ് വിമാനത്താവളത്തിന്റെ അടുത്തായി നിർത്തി. ഡോർ തുറന്നതും അയാൾ പുറത്തേക്ക് ഓടി. കണ്ടക്ടറും ഡ്രൈവറും പിന്നാലെ ഓടി അയാളെ പിടിച്ചു.

ഡ്രൈവറും ബസിലുണ്ടായിരുന്നവരും പൊലീസ് സ്റ്റേഷനിലുള്ളവരും സഹായിച്ചു. പരാതി കൊടുക്കാൻ കഴിഞ്ഞതിൽ സന്തോഷമുണ്ട്. ഇനി അവൻ സിബ് തുറക്കാൻ പേടിക്കണം.- നന്ദിത പറഞ്ഞു.