പള്ളിക്കൽ : നാവിക സേനയിൽ അഗ്​നിവീർ പരിശീലനത്തിന്​ പോയ മലയാളി യുവതിയെ മൽവാനിയിലെ നാവികസേനാ ഹോസ്റ്റൽ മുറിയിൽ തൂങ്ങിമരിച്ചനിലയിൽ കണ്ടെത്തി. അടൂർ പളളിക്കൽ തോട്ടുവ ഉദയമംഗലം വീട്ടിൽ ശാന്തകുമാരൻ നായരുടെയും വിമലയുടെയും മകൾ അപർണ വി. നായരാണ് (20) മരിച്ചത്. പ്രാഥമിക പരിശീലനത്തിന്​ശേഷം രണ്ടാഴ്ച മുമ്പാണ്​ മുംബയിലെത്തിയത്​. ഐ.എൻ.എസ്​ ഹംലയിൽ പരിശീലനത്തിലായിരുന്നു. ​ ഒപ്പം താമസിക്കുന്ന പെൺകുട്ടി തിങ്കളാഴ്ച രാവിലെ 10.30 ന് എത്തിയപ്പോൾ മുറി അകത്തുനിന്ന്​ പൂട്ടിയിരുന്നു. വിളിച്ചിട്ടും തുറന്നില്ല. തുടർന്ന്​ ​ മറ്റുള്ളവരെത്തി വാതിൽ കുത്തിത്തുറക്കുകയായിരുന്നു. ആശുപത്രിയിൽ എത്തിച്ചെങ്കിലും മരിച്ചിരുന്നു. വ്യക്തിപരമായ കാരണങ്ങളാണ് മരണത്തിന് പിന്നിലെന്ന് നാവികസേനാ വൃത്തങ്ങൾ പറഞ്ഞു. മൽവാനി പൊലീസ്​ അന്വേഷണം ആരംഭിച്ചു. നാവിക സേനയും അന്വേഷണത്തിന് ​ഉത്തരവിട്ടുണ്ട്​. സംസ്കാരം ഇന്ന് രാവിലെ 11 ന്​ വീട്ടുവളപ്പിൽ . ഏക സഹോദരൻ: വിഷ്ണു (ഇംഗ്ലണ്ട് ).