ബൈക്ക് മോഷണം: പ്രതികൾ പിടിയിൽ

കൊല്ലം: ശങ്കരമംഗലം ഭാഗത്ത് നിന്ന് ബൈക്ക് മോഷ്ടിച്ച് കറങ്ങി നടന്ന പ്രതികൾ പിടിയിൽ. മരുത്തടി, കന്നിമേൽ ചേരി തേവര് പറമ്പിൽ അനന്തകൃഷ്ണൻ (24), ചവറ, പന്മന, ശങ്കുതറ കിഴക്കതിൽ ലിബിൻ (28) എന്നിവരാണ് ചവറ പൊലീസിന്റെ പിടിയിലായത്. ജോലിയ്ക്ക് പോകും വഴി ബൈക്ക് ഉടമയായ ഉല്ലാസ് ശങ്കരമംഗലം ഭാഗത്ത് പാർക്ക് ചെയ്തിരുന്ന ബൈക്കാണ് പ്രതികൾ മോഷ്ടിച്ചത്.

ഈ ബൈക്കുമായി പ്രതികൾ ചവറ ബസ് സ്റ്റാൻഡിന് സമീപത്ത് നിൽക്കുന്നത് ശ്രദ്ധയിൽപ്പെട്ട പൊലീസ് സംഘത്തിന് സംശയം തോന്നുകയും പൊലീസിനെ കണ്ടതോടെ കടന്ന് കളയാൻ ശ്രമിച്ച ഇവരെ തടഞ്ഞു നിർത്തി കസ്റ്റഡിയിലെടുക്കുകയായിരുന്നു.

തുടർന്ന് ഇവരെ ചോദ്യം ചെയ്തതിൽ നിന്നാണ് മോഷ്ടിച്ച ബൈക്കുമായി കറങ്ങി നടക്കുകയായിരുന്നുവെന്ന് വൃക്തമായത്. പിടിയിലായ അനന്തകൃഷ്ണൻ നിരവധി മോഷണ കേസുകളിലും ലിബിൻ നിരവധി ക്രിമിനൽ കേസുകളിലും പ്രതിയാണ്. ചവറ പൊലീസ് ഇൻസ്‌പെക്ടർ ബിജുവിന്റെ നേതൃത്വത്തിൽ എസ്.ഐ മഥനൻ, എസ്.സി.പി.ഒ അനിൽ, സി.പി.ഒ രതീഷ് എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.