തിരുവനന്തപുരം: സ്പെയിനിലെ മാഡ്രിഡിൽ നടക്കുന്ന ഫിടൂർ ടൂറിസം മേളയിലെ കേരള ടൂറിസം പവലിയന് മികച്ച പ്രതികരണം. 'എന്നും മാസ്മരിക ദിനങ്ങൾ" എന്ന പ്രമേയത്തിലാണ് പവലിയൻ ഒരുക്കിയത്.
കേരളത്തിലേക്ക് ഏറ്റവുമധികം വിദേശസഞ്ചാരികൾ എത്തുന്ന സ്പെയിനിൽ നിന്ന് കൂടുതൽ ബിസിനസ് നേടാൻ മേള സഹായകമാകും. 2019ൽ 18,947 സഞ്ചാരികളാണ് സ്പെയിനിൽ നിന്ന് എത്തിയത്.
സംഘത്തെ നയിക്കുന്ന ടൂറിസം ഡയറക്ടർ പി.ബി. നൂഹ് ഐക്യരാഷ്ട്രസഭയുടെ വേൾഡ് ടൂറിസം ഓർഗനൈസേഷന്റെ ഏഷ്യ-പസഫിക് മേഖലയുടെ പ്രോഗ്രാം ഓഫീസർ ക്രിസ്റ്റീൻ ബ്രൂവുമായി ചർച്ച നടത്തി. ബാർസിലോണ, മിലാൻ, പാരിസ്, ലണ്ടൻ എന്നിവിടങ്ങളിലും കേരള സംഘം വാണിജ്യ ചർച്ചകളിൽ പങ്കെടുക്കും.
ഫിടൂർ മേള മികച്ച വിജയമാണെന്നും സ്പാനിഷ് സഞ്ചാരികളുടെ വരവ് കൂടാൻ സഹായിക്കുമെന്നും നൂഹ് പറഞ്ഞു. സി.ജി.എച്ച് എർത്ത്, സോമതീരം ആയുർവേദ ഗ്രൂപ്പ്, അബാദ് ഹോട്ടൽസ് ആൻഡ് റിസോർട്സ്, സാൻറോസ് കിംഗ് ടൂർസ് ആൻഡ് ട്രാവൽസ്, സന്ദാരി റിസോർട്സ്, അമര ആയുർവേദ റിട്രീറ്റ്, പോൾ ജോൺ റിസോർട്സ്, ഹിന്ദുസ്ഥാൻ ബീച്ച് റിട്രീറ്റ്, ട്രാവൽ കോർപ്പേറേഷൻ ഇന്ത്യ എന്നിവയാണ് കേരളത്തിൽ നിന്നും ഫിടൂറിലെത്തിയിട്ടുള്ളത്.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |