ന്യൂഡല്ഹി: നിരോധിത സംഘടനയായ സിമിയില് പ്രവര്ത്തിച്ചിരുന്ന ഭീകരനെ 22 വര്ഷത്തെ തെരച്ചിലിനൊടുവില് പിടികൂടി പൊലീസ്. ഹനീഫ് ഷെയ്ഖിനെയാണ് മഹാരാഷ്ട്രയില് നിന്ന് പൊലീസ് പിടികൂടിയത്. ദേശവിരുദ്ധ പ്രവര്ത്തനങ്ങളുടെ പേരില് യുഎപിഎ ഉള്പ്പെടെയുള്ള വകുപ്പുകള് ഇയാള്ക്കെതിരെ ചുമത്തിയിരുന്നു. 2001 മുതല് ഇയാള്ക്കായി പൊലീസ് അന്വേഷണം നടത്തിവരികയായിരുന്നു.
കഴിഞ്ഞ 25 വര്ഷമായി സിമിയുടെ ഇസ്ലാമിക് മൂവ്മെന്റ് മാസികയുടെ ഉറുദു എഡിഷന്റെ എഡിറ്ററായി പ്രവര്ത്തിച്ച് വരികയായിരുന്നു ഷെയ്ഖ്. തന്റെ പ്രഭാഷണങ്ങളിലൂടെ മുസ്ലീം യുവാക്കളെ സിമിയിലേക്ക് ആകര്ഷിക്കാന് ഇയാള്ക്ക് കഴിഞ്ഞിരുന്നുവെന്നാണ് പൊലീസ് പറയുന്നത്.
പ്രതിയെക്കുറിച്ച് കൂടുതല് വിവരങ്ങള് കൈവശമില്ലെന്നതാണ് പൊലീസ് നേരിട്ടിരുന്ന പ്രധാന വെല്ലുവിളി. ഇസ്ലാമിക് മൂവ്മെന്റ് മാസികയില് അച്ചടിച്ചിരുന്ന ഹനീഫ് ഹുദായ് എന്ന പേര് മാത്രമാണ് പൊലീസിന്റെ കൈവശമുണ്ടായിരുന്ന ഒരേയൊരു വിവരം. മഹാരാഷ്ട്രയിലെ ഭുസാവലില് കഴിഞ്ഞുവന്നിരുന്ന ഇയാള് കൊടും ഭീകരനാണെന്നാണ് ഡല്ഹി പൊലീസ് ഡിസിപി അങ്കിത് സിംഗ് പ്രതികരിച്ചത്.
മഹാരാഷ്ട്രയിലും പ്രതിക്കെതിരെ ദേശവിരുദ്ധ പ്രവര്ത്തനങ്ങളുടെ പേരില് കേസുകള് രജിസ്റ്റര് ചെയ്യുകയും യുഎപിഎ ചുമത്തുകയും ചെയ്തിരുന്നതായും പൊലീസ് പറയുന്നു. മഹാരാഷ്ട്ര, മദ്ധ്യപ്രദേശ്, ഡല്ഹി, കര്ണാടക, കേരളം തുടങ്ങിയ സംസ്ഥാനങ്ങളില് സിമി യോഗങ്ങള് സംഘടിപ്പിക്കുകയും പങ്കെടുക്കുകയും ചെയ്തിരുന്നുവെന്നും പൊലീസ് പറയുന്നു.
2002ലാണ് ഇയാളെ പിടികൂടാന് ഡല്ഹി കോടതി ഉത്തരവിട്ടത്. കഴിഞ്ഞ നാല് വര്ഷമായി ഹനീഫിനെ പിടികൂടാന് പൊലീസ് തീവ്ര ശ്രമത്തിലായിരുന്നു. എന്നാല് ഇതിനിടെ ഇയാള് മുഹമ്മദ് ഹനീഫ് എന്ന് പേര് മാറ്റുകയും ചെയ്തു. ഭുസാവലിലെ ഒരു ഉര്ദു മീഡിയം സ്കൂളില് ഇയാള് ജോലി ചെയ്ത് വരികയായിരുന്നുവെന്നും പൊലീസ് പറയുന്നു.
സ്കൂളില് ജോലി ചെയ്തുവരുന്ന വിവരം ലഭിച്ചതാണ് പ്രതിയെ പിടികൂടുന്നതില് നിര്ണായകമായതെന്ന് ഡല്ഹി പൊലീസ് പറയുന്നു. ഫെബ്രുവരി 22ന് ആണ് സിമി ഭീകരനെ ഭുസാവലില് നിന്ന് പിടികൂടിയത്. പൊലീസ് പിടികൂടാതിരിക്കാനായി താന് നിരന്തരം സ്ഥലങ്ങള് മാറിക്കൊണ്ടേയിരുന്നുവെന്ന് പ്രതി സമ്മതിച്ചുവെന്നും പൊലീസ് പറയുന്നു.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |