തിരുവനന്തപുരം: കേരളത്തില് വേനല് മഴ പെയ്തെങ്കിലും ചൂടിന് കാര്യമായ ശമനമില്ല. സംസ്ഥാനത്തെ ഏഴ് ജില്ലകളില് ചൊവ്വാഴ്ച വരെ താപനില ഉയര്ന്ന് തന്നെ തുടരുമെന്നാണ് കാലാവസ്ഥാ വകുപ്പിന്റെ മുന്നറിയിപ്പ്. തൃശൂര്, പാലക്കാട്, കോഴിക്കോട്, കണ്ണൂര്, കൊല്ലം, ആലപ്പുഴ, കാസര്കോഡ് ജില്ലകളില് കടുത്ത ചൂട് തുടരും. ഇവിടങ്ങളില് യെല്ലോ അലേര്ട്ട് പ്രഖ്യാപിച്ചിട്ടുണ്ട്.
തൃശൂര്, പാലക്കാട് ജില്ലകളില് ഉയര്ന്ന താപനില 39 ഡിഗ്രി സെല്ഷ്യസ് വരെയും കോഴിക്കോട് ജില്ലയില് ഉയര്ന്ന താപനില 38 ഡിഗ്രി സെല്ഷ്യസ് വരെയും കണ്ണൂര് ജില്ലയില് 37 ഡിഗ്രി സെല്ഷ്യസ് വരെയും കൊല്ലം, ആലപ്പുഴ, കാസര്ഗോഡ് ജില്ലകളില് ഉയര്ന്ന താപനില 36 ഡിഗ്രി സെല്ഷ്യസ് വരെയും ഉയരാന് സാദ്ധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിക്കുന്നു.
സാധാരണയേക്കാള് രണ്ടുമുതല് നാലു ഡിഗ്രി സെല്ഷ്യസ് വരെ താപനില ഉയരാന് സാദ്ധ്യതയെന്നാണ് മുന്നറിയിപ്പ്. ഉയര്ന്ന താപനിലയും ഈര്പ്പമുള്ള വായുവും കാരണം ഈ ജില്ലകളില്, മലയോര മേഖലകളിലൊഴികെ ചൊവ്വാഴ്ച വരെ ചൂടും അസ്വസ്ഥതയുമുള്ള കാലാവസ്ഥയ്ക്ക് സാദ്ധ്യതയുണ്ട്.
അതേസമയം, തിരുവനന്തപുരം ജില്ലയില് ഇന്ന് കനത്ത വേനല്മഴ പെയ്തിരുന്നു. അടുത്ത ദിവസങ്ങളിലും ജില്ലയില് വേനല് മഴ പെയ്യാന് സാദ്ധ്യതയുണ്ടെന്നാണ് മുന്നറിയിപ്പ്. തലസ്ഥാന ജില്ലയ്ക്ക് പുറമേ കൊല്ലം, പത്തനംതിട്ട, ആലപ്പുഴ ജില്ലകളില് ഒറ്റപ്പെട്ടയിടങ്ങളില് ഇടിമിന്നലോട് കൂടിയ മിതമായ മഴയ്ക്ക് സാദ്ധ്യത.
മണിക്കൂറില് 40 കിലോമീറ്റര് വരെ വേഗതയില് വീശിയേക്കാവുന്ന ശക്തമായ കാറ്റുമുണ്ടാകും. കോട്ടയം, ഇടുക്കി, എറണാകുളം ജില്ലകളില് ഒറ്റപ്പെട്ടയിടങ്ങളില് നേരിയ മഴയ്ക്കും സാദ്ധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |