ആഘോഷമായി സംസ്ഥാന സ്കൂൾ പ്രവേശനോത്സവം
കൊച്ചി: പുതിയ കാലത്തെയും ലോകത്തെയും നേരിടാൻ കുട്ടികളെ പ്രാപ്തരാക്കുന്ന തരത്തിലാണ് പൊതുവിദ്യാഭ്യാസ മേഖലയെ സർക്കാർ ശക്തിപ്പെടുത്തുന്നതെന്ന് മുഖ്യമന്ത്രി പിണറായി വിജയൻ. എറണാകുളം എളമക്കര ഗവ. ഹയർ സെക്കൻഡറി സ്കൂളിൽ സ്കൂൾ പ്രവേശനോത്സവത്തിന്റെ സംസ്ഥാനതല ഉദ്ഘാടനം നിർവഹിക്കുകയായിരുന്നു മുഖ്യമന്ത്രി.
പൊതുവിദ്യാഭ്യാസ മേഖല തകർച്ച നേരിട്ടപ്പോൾ 2016ൽ പൊതുവിദ്യാഭ്യാസ സംരക്ഷണ യജ്ഞം ആരംഭിച്ചു. പിന്നീട് നാട് കണ്ടത് വിപ്ലവകരമായ മാറ്റമാണ്. ഹൈടെക് ക്ലാസ് റൂം, റോബോട്ടിക് കിറ്റ്, വിജ്ഞാനത്തോടൊപ്പം വിനോദവും കുട്ടികളുടെ നൈസർഗിക വാസനകളും പ്രോത്സാഹിപ്പിക്കുന്ന പുത്തൻ പാഠ്യപദ്ധതികൾ തുടങ്ങി വിപുലമായ സംവിധാനങ്ങളാണ് ഏർപ്പെടുത്തിയത്.
നീതി ആയോഗിന്റെ സ്കൂൾ എഡ്യൂക്കേഷൻ ക്വാളിറ്റി ഇൻഡക്സിൽ കേരളം ഒന്നാം സ്ഥാനത്ത് എത്തിയത് ചെറിയ കാര്യമല്ല. അക്കാഡമിക് രംഗത്തും അടിസ്ഥാനസൗകര്യ വികസന രംഗത്തും വലിയ മുന്നേറ്റമുണ്ടായെന്നും മുഖ്യമന്ത്രി പറഞ്ഞു.
പ്രവേശനോത്സവത്തിന്റെ ഭാഗമായി എൽ.കെ.ജി, ഒന്നാം ക്ളാസ് വിദ്യാർത്ഥികളെ മന്ത്രിമാരായ വി. ശിവൻകുട്ടി, പി. രാജീവ്, മേയർ എം. അനിൽകുമാർ തുടങ്ങിയവർ ചേർന്ന് സ്വീകരിച്ചു. അവർക്ക് മുഖ്യമന്ത്രി ബാഗും കുടയും സമ്മാനിച്ചു.
വിദ്യാർത്ഥികൾ അവതരിപ്പിച്ച പ്രവേശനോത്സവ ഗാനത്തിന്റെ ദൃശ്യാവിഷ്കാരത്തോടെയാണ് പരിപാടികൾ ആരംഭിച്ചത്. വിദ്യാഭ്യാസ മന്ത്രി വി. ശിവൻകുട്ടി അദ്ധ്യക്ഷത വഹിച്ചു. പൊതുവിദ്യാഭ്യാസ കലണ്ടർ മന്ത്രി പി. രാജീവ് പൊതുവിദ്യാഭ്യാസ ഡയറക്ടർ എം. ഷാനവാസിന് നൽകി പ്രകാശനം ചെയ്തു. എം.പിമാരായ ഹൈബി ഈഡൻ, ജെബി മേത്തർ, മേയർ അഡ്വ.എം. അനിൽകുമാർ, എം.എൽ.എമാരായ കെ. ബാബു, ടി.ജെ. വിനോദ്, കെ.ജെ. മാക്സി, പി.വി. ശ്രീനിജിൻ, ജില്ലാ പഞ്ചായത്ത് പ്രസിഡന്റ് മനോജ് മൂത്തേടൻ, പൊതുവിദ്യാഭ്യാസ വകുപ്പ് പ്രിൻസിപ്പൽ സെക്രട്ടറി റാണി ജോർജ്, വിദ്യാഭ്യാസ ഡെപ്യൂട്ടി ഡയറക്ടർ ഹണി ജി. അലക്സാണ്ടർ തുടങ്ങിയവർ പങ്കെടുത്തു.
വേദി നിയന്ത്രിച്ച് കുട്ടിക്കൂട്ടം,
നിറചിരിയോടെ മുഖ്യമന്ത്രി
കൊച്ചി: 'അടുത്തതായി നമ്മൾ ഏവരും ആകാംക്ഷയോടെ കാത്തിരുന്ന സ്കൂൾ പ്രവേശനോത്സവത്തിന്റെ സംസ്ഥാനതല ഉദ്ഘാടനമാണ്. നിലവിളക്കു കൊളുത്തി ഉദ്ഘാടന കർമ്മം നിർവഹിക്കുന്നതിന് ആദരണീയനായ കേരള മുഖ്യമന്ത്രി ശ്രീ പിണറായി വിജയനെ ക്ഷണിക്കുന്നു..' എറണാകുളം എളമക്കര ഗവ. ഹൈസ്കൂളിലെ വേദിയിൽ കുട്ടി അനൗൺസറുടെ ശബ്ദം മുഴങ്ങിയതോടെ മുഖ്യമന്ത്രി പിണറായി വിജയന്റെ മുഖത്ത് ചിരി വിടർന്നു.
പിന്നിലെ എൽ.ഇ.ഡി സ്ക്രീനിൽ മുഖ്യമന്ത്രിയുടെയും ഒപ്പമിരുന്നവരുടെയും ചിരി നിറഞ്ഞപ്പോൾ സദസിൽ നിറഞ്ഞ കൈയടി. ഇരുവശങ്ങളിലിരുന്ന മന്ത്രിമാരായ പി. രാജീവിനോടും വി.ശിവൻകുട്ടിയോടും അതിനെക്കുറിച്ച് മുഖ്യമന്ത്രി ചിരിയോടെ എന്തോ പറഞ്ഞു.
എളമക്കര ഗവ. ഹൈസ്കൂളിലെ ഒൻപതാം ക്ലാസുകാരി എൻ. ശ്രീരസ്യ. പത്താംക്ലാസുകാരി അമ്റിൻ ഫാത്തിമ, ആറാം ക്ലാസുകാരൻ കെ.സിദ്ധാർത്ഥ് എന്നിവരായിരുന്നു പ്രവേശനോത്സവ പരിപാടിയുടെ അവതാരകർ. ഒരാഴ്ച നീണ്ട പരിശീലനത്തിനു ശേഷമാണ് കുട്ടിക്കൂട്ടം തട്ടിൽ കയറിയത്. അദ്ധ്യാപകരായ സി.എ. റഹ്മത്ത്, ബി. ലിജിമോൾ എന്നിവരാണ് കുട്ടികളെ പരിശീലിപ്പിച്ചത്.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |