തൃശൂർ: ലഹരിക്കെതിരെ ജനകീയ പ്രതിരോധം സൃഷ്ടിക്കുമെന്ന് എക്സൈസ് മന്ത്രി എം.ബി.രാജേഷ്. 135 സിവിൽ എക്സൈസ് ഓഫീസർമാരുടെയും ഒമ്പത് വനിതാ സിവിൽ എക്സൈസ് ഓഫീസർമാരുടെയും പാസിംഗ് ഔട്ട് പരേഡിൽ സംസാരിക്കുകയായിരുന്നു അദ്ദേഹം. വിദ്യാലയങ്ങൾക്ക് സമീപമുള്ള കടകളിൽ ലഹരിവസ്തുക്കൾ വിൽക്കുന്നില്ലെന്ന് ഉറപ്പാക്കാൻ കർശനപരിശോധന നടത്തും. വിദ്യാലയ പരിസരങ്ങളിൽ തമ്പടിക്കുന്നവരെ നിരീക്ഷിക്കുന്നതിനായി പൊലീസ്, എക്സൈസ്, വിദ്യാലയ, തദ്ദേശസ്ഥാപന പ്രതിനിധികളെ ഏകോപിപ്പിക്കും.
സിന്തറ്റിക് ഡ്രഗ്സ് ഉയർത്തുന്ന വെല്ലുവിളികളെ കാര്യക്ഷമമായി നേരിടും. ലഹരി വസ്തുക്കളുടെ ഉറവിടം കണ്ടെത്തുന്നതിൽ മികച്ച പ്രവർത്തനമാണ് വകുപ്പ് നടത്തുന്നത്. മയക്കുമരുന്ന് ശൃംഖലയെ തകർക്കാൻ പൊതുജനങ്ങളുടെ പിന്തുണ അനിവാര്യമാണ്. സംസ്ഥാന, ജില്ലാ, താലൂക്ക്, വാർഡ്, സ്കൂൾ തലങ്ങളിൽ സമിതി രൂപീകരിച്ചുള്ള പ്രവർത്തനം പുരോഗമിക്കുകയാണ്. പരിശീലനം നേടിയവരുടെ ഉയർന്ന വിദ്യാഭ്യാസം വകുപ്പിന് കൂടുതൽ മികവുണ്ടാക്കും. വനിതകൾ, ദുർബല വിഭാഗങ്ങൾ എന്നിവരെ നിയമിക്കുന്നതിൽ പ്രത്യേകം ശ്രദ്ധിക്കുന്നുണ്ടെന്നും മന്ത്രി പറഞ്ഞു.
കെ.ജി.ഒ.എ സംസ്ഥാന ഭാരവാഹികൾ
കൊല്ലം: കേരള ഗസറ്റഡ് ഓഫീസേഴ്സ് അസോസിയേഷൻ (കെ.ജി.ഒ.എ) 58-ാമത് സംസ്ഥാന സമ്മേളനത്തിന് സി.കേശവൻ സ്മാരക ടൗൺ ഹാളിൽ തുടക്കമായി.
രാവിലെ പ്രസിഡന്റ് ഡോ. എം.എ.നാസർ പതാക ഉയർത്തി. തുടർന്ന് ചേർന്ന സംസ്ഥാന കൗൺസിലിൽ ജനറൽ സെക്രട്ടറി ഡോ. എസ്.ആർ.മോഹനചന്ദ്രൻ പ്രവർത്തന റിപ്പോർട്ടും ട്രഷറർ പി.വി.ജിൻരാജ് വരവുചെലവ് കണക്കും അവതരിപ്പിച്ചു. വിവിധ ജില്ലകളെ പ്രതിനിധീകരിച്ച് 20 പേർ പൊതുചർച്ചയിൽ പങ്കെടുത്തു. ഇന്ന് രാവിലെ 10.30ന് പ്രതിനിധി സമ്മേളനം മാഗ്സസെ അവാർഡ് ജേതാവും മാദ്ധ്യമപ്രവർത്തകനുമായ പി.സായ്നാഥ് ഉദ്ഘാടനം ചെയ്യും. എം.നൗഷാദ് എം.എൽ.എ പങ്കെടുക്കും.
ഭാരവാഹികളായി ഡോ. എസ്.ആർമോഹനചന്ദ്രൻ (പ്രസിഡന്റ്), പി.പി.സുധാകരൻ, കുഞ്ഞിമമ്മു പറവത്ത്, ഡോ. സിജി സോമരാജൻ (വൈസ് പ്രസിഡന്റ്), എം.ഷാജഹാൻ ( ജനറൽ സെക്രട്ടറി), എം.എൻ.ശരത്ത്ചന്ദ്രലാൽ, ഇ.വി.സുധീർ, ജയൻ.പി.വിജയൻ (സെക്രട്ടറി), എ.ബിന്ദു (ട്രഷറർ) എന്നിവരെ തിരഞ്ഞെടുത്തു. എം.ഷാജഹാൻ സംഘടനാ പ്രമേയം അവതരിപ്പിച്ചു.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |