മല്ലപ്പള്ളി : കാറ്റിലും മഴയിലും മരം വീണ് പടുതോട് - എഴുമറ്റൂർ ബാസ്റ്റോ റോഡിൽ മൂന്ന് മണിക്കൂർ ഗതാഗതം തടസപ്പെട്ടു. കോട്ടയം - കോഴഞ്ചേരി സംസംസ്ഥാന പാതയിലും പടുതോട് - കാവുംപുറം റോഡിലും 15 മിനിറ്റോളം ഗതാഗതം മുടങ്ങി. ഇന്നലെ ഉച്ചയ്ക്ക് ഒരുമണിക്ക് ശേഷമാണ് മരങ്ങൾ റോഡിന് കുറുകെ വീണത്. പടുതോട് - കാവുംപുറം റോഡിൽ പടുതോട് പാലത്തിന് സമീപം സ്വകാര്യ വ്യക്തിയുടെ തേക്കുമരം ഇലവൻ കെ.വി ലൈനിന് മുകളിൽ ഒടിഞ്ഞ് വീണു. സ്വകാര്യ ആശുപത്രിയിലെ ജീവനക്കാരി പരിയാരം സ്വദേശിനിയായ സ്കൂട്ടർ യാത്രിക രക്ഷപെട്ടത്ത് തലനാരിഴയ്ക്കാണ്. പടുതോട് - എഴുമറ്റൂർ ബാസ്റ്റോ റോഡിൽ നാലിടങ്ങളിൽ മരം റോഡിന് കുറുകെ പതിച്ചു. പടുതോട് ക്ഷേത്രത്തിന് സമീപം ഇരുവശങ്ങളിലായി സ്വകാര്യ വ്യക്തികളുടെ പ്ലാവ്, തേക്ക് എന്നിവ ഒടിഞ്ഞ് വൈദ്യുത ലൈനിന് മുകളിൽ പതിച്ചു. മല്ലപ്പള്ളി കടുവാകുഴിക്ക് സമീപവും ഈട്ടിക്കപടിയ്ക്ക് സമീപവും തേക്കുമരങ്ങൾ വൈദ്യുത ലൈനിന് മുകളിൽ പതിച്ചു. 20 മിനിറ്റോളം ഗതാഗതം തടസപ്പെട്ടു. വിവിധ പ്രദേശങ്ങളിൽ നാട്ടുകാരുടെ നേതൃത്വത്തിൽ മരം മുറിച്ചു മാറ്റിയാണ് ഗതാഗതം പുന:സ്ഥാപിച്ചത്. വൈദ്യുതി വിതരണം പുനസ്ഥാപിക്കാനായിട്ടില്ല. കൊറ്റനാട് പഞ്ചായത്തിൽ 12-ാം വാർഡിൽ ചാമക്കാലായിൽ സിനാജിന്റെ വീടിന് മുകളിൽ പുളിമരം വീണ് ഷീറ്റും ഓടും തകർന്നു.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |