ന്യൂഡൽഹി: യുഎസ് സന്ദർശനത്തിനിടെ ചിക്കാഗോ മിഷിഗൺ തടാക തീരത്ത് സൈക്കിൾ ഓടിക്കുന്ന തമിഴ്നാട് മുഖ്യമന്ത്രി എം കെ സ്റ്റാലിന്റെ വീഡിയോ സോഷ്യൽ മീഡിയയിൽ വൈറലാണ്. ചിക്കാഗോ നഗരത്തിലൂടെ സൈക്കിൾ സവാരി നടത്തുന്ന വീഡിയോ സ്റ്റാലിൻ തന്നെയാണ് സമൂഹമാദ്ധ്യമത്തിൽ പങ്കുവച്ചത്. ‘സായാഹ്ന ശാന്ത അന്തരീക്ഷം പുതിയ സ്വപ്നങ്ങൾക്ക് കളമൊരുക്കുന്നു’ എന്ന അടിക്കുറിപ്പോടെയാണ് അദ്ദേഹം വീഡിയോ പോസ്റ്റ് ചെയ്തിരിക്കുന്നത്.
71കാരനായ സ്റ്റാലിന് അനാരോഗ്യമാണെന്ന് പറഞ്ഞവർക്കുള്ള മറുപടിയാണിതെന്ന് ചിലർ വീഡിയയ്ക്ക് താഴെ കുറിച്ചു. സ്റ്റാലിൻ വൈകാതെ രാഷ്ട്രീയത്തിൽ നിന്ന് മാറുമെന്നും പാർട്ടി നേതൃസ്ഥാനവും ഭരണച്ചുമതലയും മകൻ ഉദയനിധിക്ക് വിട്ടുനൽകുമെന്നുമായിരുന്നു വിമർശകർ പറഞ്ഞിരുന്നത്. അടുത്തിടെ ഡി.എം.ഡി.കെ ജനറൽ സെക്രട്ടറി പ്രേമലത വിജയകാന്ത് ഉൾപ്പെടെയുള്ളവർ സ്റ്റാലിന്റെ ആരോഗ്യനില വഷളായതായി പറഞ്ഞിരുന്നു. ഇതിനിടെയാണ് സ്റ്റാലിൻ വീഡിയോ പങ്കുവച്ചിരിക്കുന്നത്. നിക്ഷേപക സംഗമത്തിൽ പങ്കെടുക്കാനാണ് സ്റ്റാലിൻ പത്ത് ദിവസത്തെ സന്ദർശനത്തിന് യു.എസിലെത്തിയത്.
വീഡിയോ ചർച്ചയാകുന്നതിനിടെ സ്റ്റാലിന്റെ പോസ്റ്റിന് കമന്റുമായി രംഗത്തെത്തിയിരിക്കുകയാണ് കോൺഗ്രസ് നേതാവ് രാഹുൽ ഗാന്ധി. 'സഹോദരാ... എന്നാണ് നമ്മളൊരുമിച്ച് ചെന്നെെയിൽ സെെക്കിൾ ചവിട്ടുന്നത്', എന്നാണ് രാഹുൽ കുറിച്ചത്. പിന്നാലെ രാഹുലിനെ ക്ഷണിച്ച് സ്റ്റാലിനും രംഗത്തെത്തി. ഒഴിവ് കിട്ടുന്ന സമയം ചെന്നെെയിൽ വരാനും സെെക്കിൾ ഒരുമിച്ച് ചവിട്ടിയ ശേഷം വീട്ടിൽ നിന്ന് ഭക്ഷണം കഴിക്കാമെന്നും അദ്ദേഹം രാഹുലിനെ കമന്റിലൂടെ അറിയിച്ചു. രണ്ട് രാഷ്ട്രീയ പാർട്ടികളിൽ ഉള്ളവരാണെങ്കിലും വളരെ അടുത്ത സൗഹൃദം പുലർത്തുന്നവരാണ് രാഹുലും സ്റ്റാലിനും.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |