പുലിക്കളിക്കൊരു എ.ഐ പാട്ട്

തൃശൂർ: തൃശൂരിലെ പുലിക്കളിയെക്കുറിച്ച്, ആർട്ടിഫിഷ്യൽ ഇന്റലിജൻസിൽ ചെയ്ത 'പുലിക്കൊട്ടും പനംതേങ്ങേം' എന്ന ഓഡിയോ സോംഗിന്റെ വീഡിയോ ആവിഷ്‌കാരം യൂട്യൂബിൽ റിലീസ് ചെയ്തു. മലയാളത്തിൽ ആദ്യമായി റിലീസ് ചെയ്ത എ.ഐ പാട്ടുകളുടെ ഓഡിയോ കളക്ഷനായ 'കണ്ണിൻ ചിറകിലൊരു മഴത്തുള്ളി'യിലേതാണ് ഈ പാട്ട്. ചിത്രങ്ങൾ ഉപയോഗിച്ച്, കവിയും ഡോക്യുമെന്റേറിയനുമായ സതീഷ് കളത്തിലാണ് ചെയ്തിരിക്കുന്നത്. സാമ്പത്തിക പ്രതിസന്ധിമൂലം, പുലിക്കളി അന്യംനിന്നുപോകാൻ സാദ്ധ്യതയുള്ള സാഹചര്യത്തിൽ, കേരള ഫോക് ലോർ അക്കാഡമിയുടെ നാടൻ കലാവിഭാഗത്തിൽ ഉൾപ്പെട്ട ഈ പ്രാചീന കലയുടെ സംരക്ഷണ പ്രചാരണാർത്ഥമായാണ്, വീഡിയോ സോംഗ് പുറത്തിറക്കിയിരിക്കുന്നത്. സതീഷ് കളത്തിലിന്റെ എട്ട് ഓണപ്പാട്ടുകളുടെ എ.ഐ ഓഡിയോ കളക്ഷനാണ് 'കണ്ണിൻ ചിറകിലൊരു മഴത്തുള്ളി.' മ്യൂസിക്കിനൊപ്പം വരികളും പാട്ടായി ജനറേറ്റ് ചെയ്യുന്ന എ.ഐ. സൈറ്റിലാണ് ചെയ്തത്.