വഖഫ് വിഷയം പരിഹരിക്കാൻ ഏറ്റവും ലളിതമായ മാർഗമുണ്ട്, പക്ഷേ അതിനും സർക്കാരിന് ഭയമാണ്

കേന്ദ്ര സർക്കാരി​ന്റെ വഖഫ് നി​യമഭേദഗതി​ വി​വാദത്തി​നൊപ്പം കത്തി​പ്പടരുകയാണ്, കൊച്ചിയിൽ 614 കുടുംബങ്ങൾ കുടിയിറക്കു ഭീഷണി നേരിടുന്ന മുനമ്പത്തെ വഖഫ് ഭൂമി​ പ്രശ്നവും. ഇതിനു പുറമേയാണ്,​ കഴിഞ്ഞ ദിവസം വയനാട് മാനന്തവാടിയിലും 5.45 ഏക്കർ ഭൂമിക്കു മേൽ വഖഫ് നോട്ടീസ് ലഭിച്ചിരിക്കുന്നത്. സർക്കാരിനും രാഷ്ട്രീയ പാർട്ടികൾക്കും മുസ്ളിം സംഘടനകൾക്കും കണ്ടില്ലെന്നു നടിക്കാനാവാത്ത വിധം ദേശീയ വിഷയമായി മുനമ്പം മാറിക്കഴിഞ്ഞു.

കേന്ദ്ര വഖഫ് ഭേദഗതി ബില്ലാണ് മുനമ്പം ഭൂമി പ്രശ്നവും പൊതുശ്രദ്ധയിൽ കൊണ്ടുവന്നത്. 1902-ൽ ഗുജറാത്തി​ൽ നി​ന്നെത്തി​യ അബ്ദുൾ സത്താർ മൂസാ സേട്ടി​ന് തി​രുവി​താംകൂർ രാജാവ് കൃഷി​ക്കായി​ നൽകി​യ 404 ഏക്കർ 75 സെന്റ് ഭൂമി​യി​ൽ കടലെടുത്ത ശേഷം ശേഷി​ക്കുന്ന 104 ഏക്കർ ഭൂമി​യാണ് മുനമ്പത്തെ വഖഫ് ഭൂമി​ പ്രശ്നത്തി​ന് ആധാരം. സത്താർ സേട്ടി​ന്റെ പി​ൻഗാമി​ ഈ സ്ഥലം കോഴി​ക്കോട് ഫാറൂക്ക് കോളേജ് മാനേജ്മെന്റി​ന് ക്രയവി​ക്രയാധി​കാരമുള്ള വ്യവസ്ഥകളോടെ ദാനം നൽകി​. ആധാരത്തി​ൽ വഖഫായി​ ദാനം ചെയ്യുന്നുവെന്ന രണ്ടു പരാമർശങ്ങളാണ് ഇത് വഖഫ് ഭൂമി​യാണെന്ന് പ്രഖ്യാപി​ക്കാനുള്ള വഖഫ് ബോർഡി​ന്റെ ന്യായം.

ഇസ്ളാമി​ക നി​യമപ്രകാരം വി​ശ്വാസി​ ദൈവത്തി​നു സമർപ്പി​ക്കുന്ന സ്വത്താണ് വഖഫ്. രേഖാമൂലമോ വാക്കാലോ വഖഫ് ചെയ്യപ്പെട്ടു കഴിഞ്ഞാൽ അത് എക്കാലത്തേക്കും വഖഫ് ഭൂമി​യെന്നാണ് വ്യവസ്ഥ. വഖഫ് ബോർഡി​ന്റെ അനുമതി​യി​ല്ലാതെ കൈമാറ്റം ചെയ്യാനാവി​ല്ല. തനിക്ക് സമ്പൂർണാവകാശമുള്ളതോ ഇല്ലാത്തതോ ആയവ വഖഫ് ചെയ്താൽ വഖഫ് ബോർഡിന് ആ സ്വത്ത് നോട്ടീസ് പോലും നൽകാതെ അവകാശപ്പെടാം. ചോദ്യം ചെയ്ത് കോടതികളെ സമീപിക്കാനാവില്ല. വഖഫ് ട്രിബ്യൂണലിനു മുന്നിൽ പരാതി നൽകാമെന്നു മാത്രം. സ്വന്തം ഭൂമി​യുടെ അവകാശം സ്ഥാപി​ക്കേണ്ടതി​ന്റെ ബാദ്ധ്യത ഉടമയ്ക്കു മേൽവരുന്ന വി​ചി​ത്രവ്യവസ്ഥയാണ് വഖഫ് നി​യമത്തി​ലെ ഈ കീറാമുട്ടി​. ഇത് ഒഴിവാക്കുന്നതാണ് വഖഫ് ഭേദഗതി ബില്ല്.

വഖഫ് നി​യമം സംസ്ഥാനത്തെ ഇടതു, വലതുമുന്നണി​കളെ വെട്ടി​ലാക്കി​. ബി​.ജെ.പി​ സർക്കാരി​ന്റെ ബി​ല്ലി​നെ അനുകൂലി​ക്കാനോ എതി​ർക്കാനോ വയ്യാത്ത അവസ്ഥ. ബി​ല്ലി​നെ എതി​ർക്കുന്ന പ്രമേയത്തെ അനുകൂലിച്ച് 140 എം.എൽ.എമാരും കേരള നി​യമസഭയി​ൽ വോട്ട് ചെയ്ത ശേഷം,​ മുനമ്പത്തെ വേളാങ്കണ്ണി​ പള്ളി​മുറ്റത്തെ സമരപ്പന്തലി​ൽ പോയി​ സമരക്കാർക്കൊപ്പമാണെന്നു പറയേണ്ട ഗതി​കേടി​ലാണ് ഇരു മുന്നണി​ നേതാക്കളും. ഈ പ്രശ്നത്തി​ൽ ഇപ്പോൾ ലാഭം കൊയ്യുന്ന് ബി​.ജെ.പി​യും ഹി​ന്ദു സംഘടനകളുമാണ്. ക്രൈസ്തവ വി​കാരം ബി​.ജെ.പി​ക്ക് അനുകൂലമാകുന്ന സ്ഥി​തി​യി​ലായി​ കാര്യങ്ങൾ. എങ്ങ​നെ തലയൂരാമെന്ന ആലോചനയി​ലാണ് സംസ്ഥാന സർക്കാർ. മുസ്ളിം ലീഗും പ്രമുഖ മുസ്ളിം സംഘടനകളും സമവായ പാതയി​ലാണെങ്കിലും ഒത്തുതീർപ്പ് ഫോർമുലകളൊന്നും ഉരുത്തിരിയുന്നുമില്ല. വഖഫ് ബോർഡിന്റെ അവകാശവാദം ഇല്ലാതായെങ്കിലേ താമസക്കാർക്ക് സ്വന്തം ഭൂമിയുടെ കരം അടയ്ക്കാനാകൂ.

സർക്കാരി​നു മുന്നി​ലുള്ളത്

1. പാട്ടം റദ്ദാക്കി,​ ഭൂമി ഏറ്റെടുത്ത് കൈവശക്കാർക്ക് പതി​ച്ചു നൽകുക. എന്നാൽ,​ കേസുകൾ വരാം. വ്യവഹാരം നീളാം. മുസ്ളിം സംഘടനകളുടെ എതി​ർപ്പുണ്ടാകും.

2. വഖഫ് ബോർഡി​ന് പകരം ഭൂമി​യോ പണമോ നൽകി​ മുനമ്പം ഭൂമി​ ഏറ്റെടുത്ത് കൈവശക്കാർക്ക് നൽകാം. അതേസമയം,​ എതി​ർപ്പും കേസുകളും ഉറപ്പ്. രാഷ്ട്രീയ തി​രച്ചടി​യുമുണ്ടാകാം.

3. വഖഫ് ഭൂമി​യാണെന്ന തീരുമാനം വഖഫ് ബോർഡി​നെക്കൊണ്ട് റദ്ദാക്കി​ക്കുകയാണ് ഏറ്റവും ലളി​തമായ മാർഗം. ഉടമകൾക്ക് കരം അടയ്ക്കാനുമാകും. എന്നാൽ,​ തീവ്രമുസ്ളിം സംഘടനകളുടെയും വഖഫ് സംരക്ഷണ സമി​തി​യുടെയും എതി​ർപ്പ് ഉറപ്പ്.

വഖഫ് നിയമങ്ങൾ

1923-ലാണ് വഖഫ് സ്വത്തുക്കളുടെ സംരക്ഷത്തിന് ആദ്യ വഖഫ് നി​യമം ബ്രി​ട്ടീഷ് സർക്കാർ കൊണ്ടുവന്നത്. 1954-ൽ കേന്ദ്രസർക്കാർ പുതി​യ വഖഫ് നി​യമം നടപ്പാക്കി​. 1995-ൽ കൂടുതൽ അധി​കാരങ്ങളോടെ പുതി​യ നി​യമം കൊണ്ടുവന്നു. കേന്ദ്ര വഖഫ് കൗൺ​സി​ലും, സംസ്ഥാന വഖഫ് ബോർഡുകളും രൂപീകരി​ക്കപ്പെട്ടു. ദീർഘനാളായി​ മതാനുഷ്ഠാനങ്ങൾക്ക് ഉപയോഗി​ക്കുന്ന ഇടങ്ങളും മറ്റും വഖഫ് ആയി​ പ്രഖ്യാപി​ക്കാൻ ബോർഡി​ന് നി​യമം അധി​കാരം നൽകുന്നുണ്ട്. സർക്കാരാണ് ബോർഡ് ചെയർമാനെയും അംഗങ്ങളെയും നി​യമി​ക്കുക. ചീഫ് എക്സി​ക്യുട്ടീവ് ഓഫീസറെ നി​യമി​ച്ച് സർക്കാരി​ന് നേരി​ട്ടും ഭരി​ക്കാം. 2013-ൽ നി​യമം പരി​ഷ്കരി​ച്ച് കൂടുതൽ അധി​കാരങ്ങൾ നൽകി​.

കേരള വഖഫ് ബോർഡ് രൂപീകരിക്കപ്പെട്ടത് 1995-ലാണ്. ആസ്ഥാനം കൊച്ചി​. ചെയർമാനും ഒമ്പത് അംഗങ്ങളുമുണ്ട്. വഖഫ് ട്രിബ്യൂണലിന് ജില്ലാ ജഡ്ജി റാങ്കിലുള്ളയാളാണ് ചെയർമാൻ. അഡിഷണൽ ജില്ലാ ജഡ്ജി പദവിയുള്ള അംഗവും മുസ്ളിം മതപണ്ഡിതരും ഉൾപ്പെടുന്ന മൂന്നംഗ സമിതിയാണ് ഉള്ളത്. കോഴിക്കോടാണ് ട്രിബ്യൂണൽ.

നിയമത്തിലെ

ചോദ്യങ്ങൾ

പാട്ടഭൂമി​ വി​ൽക്കാനോ ദാനം ചെയ്യാനോ കഴി​യുമോ?

ഫാറൂഖ് കോളേജി​ന് ഭൂമി​ നൽകി​യത് വഖഫോ,​ ദാനമോ?

കുടി​കി​ടപ്പുകാരെ ഇറക്കി​വി​ടാൻ കഴി​യുമോ?

വി​ൽപ്പന നി​യമവി​രുദ്ധമെങ്കി​ൽ ഫറൂക്ക് കോളേജി​നെതി​രെ നടപടി​ വേണ്ടേ?

പുതി​യ വഖഫ് നി​യമഭേദഗതി​ വന്നാൽ ഭൂപ്രശ്നം തീരുമോ?

മുനമ്പം ഭൂമി​: ചരിത്രം

1902: ഗുജറാത്തിയായ അബ്ദുൾ സത്താർ മൂസാ സേട്ടി​ന് തി​രുവി​താംകൂർ മഹാരാജാവ് മുനമ്പത്തെ 404 ഏക്കർ 75 സെന്റ് ഭൂമി കൃഷി​ക്കായി​ പാട്ടത്തി​നു നൽകി​. അന്നും ഇവി​ടെ കുടികിടപ്പുകാരുണ്ട്.

1947: സേട്ടി​ന്റെ മരണശേഷം മകൾക്കു ലഭി​ച്ച ഭൂമി​ ഭർത്താവ് സി​ദ്ദി​ഖ് സേട്ടി​ന് തീറു നൽകി​.

1950: ​ കോഴി​ക്കോട് ഫാറൂഖ് കോളേജി​ന് ഭൂമി​ ദാനമായി​ നൽകി​. കോളേജി​ന്റെ ആവശ്യത്തി​ന് വി​ൽക്കാമെന്നും കോളേജ് ഇല്ലാതായാൽ ശേഷി​ക്കുന്ന ഭൂമി​ കുടുംബത്തി​ന് തി​രി​കെ നൽകണമെന്നും വ്യവസ്ഥ.

1967: കാേളേജിന്റെ അവകാശം ചോദ്യം ചെയ്ത് പറവൂർ കോടതിയിൽ വ്യവഹാരം തുടങ്ങി.

1971: കോളേജിന് അനുകൂലമായി വിധി

1985: കോളേജിന്റെ അവകാശം അംഗീകരിച്ച് ഹൈക്കോടതി വിധി.

1987: കോളേജ് അധികൃതരും താമസക്കാരും തമ്മിൽ ഒത്തുതീർപ്പ്.

1988: ഇവർ സ്ഥലം തീറുവാങ്ങി​. പുറത്തുനി​ന്നുള്ളവർക്കും തീറ് നൽകി​. മൊത്തം 33 ലക്ഷം രൂപയുടെ ഇടപാട്

ചെറായി എന്ന സ്വർഗം

കെ.കെ. രത്നൻ

രാജ്യത്തെ പ്രമുഖ ബിസിനസ് ശൃംഖലയുടെ റി​സോർട്ടും,​ താരരാജാക്കന്മാരുടെയും ആഡംബര വസതികളും ഹോട്ടലുകളുമുള്ള,​ ദിവസവും ആയിരങ്ങൾ സന്ദർശിക്കുന്ന ചെറായി ബീച്ച് ഉൾപ്പെടുന്ന പ്രദേശമാണ് മുനമ്പം. പ്രശാന്തസുന്ദരമായ കടലോരഭൂമിയിൽ വീടുകൾ, കടകൾ, വേളാങ്കണ്ണി പള്ളി, വൈദിക മന്ദിരം, സെമിത്തേരി, കോൺവെന്റ് , ഗുരുദേവ മന്ദി​രം തുടങ്ങി​യവയുണ്ട്. വൻകി​ട റി​സോർട്ടുകളും രണ്ട് ബാർ ഹോട്ടലുകളും പള്ളി​പ്പുറം പഞ്ചായത്ത് നി​ർമ്മി​ച്ച റോഡുകളും പാലങ്ങളും വസ്തുവി​ന്റെ ഭാഗമാണ്. കുവൈറ്റുകാരൻ അറബിയുടെ ബിനാമി പേരിലുള്ള റിസോർട്ടും ഇവിടെയുണ്ട്. ടൂറി​സം സാദ്ധ്യത വി​ലയി​രുത്തി​ സെന്റി​ന് അ‍ഞ്ചു മുതൽ 30 ലക്ഷം വരെയാണ് ഭൂമിവില. വഖഫ് കേസി​ൽപ്പെട്ട ഭൂമി​കളുടെ കൈമാറ്റം സ്തംഭി​ക്കുകയും ചെയ്തു.

തലമുറകളായി താമസിച്ചിരുന്നവരും പിൻഗാമികളും സ്ഥലംവാങ്ങി താമസിച്ചവരും ഉൾപ്പടെ 614 കുടുംബങ്ങൾ

തർക്കഭൂമിയിലുണ്ട്. ഒരാൾ മാത്രമാണ് മുസ്ലിം സമുദായാംഗം. നാനൂറിലധികം കുടുംബങ്ങൾ ലത്തീൻ കത്തോലി​ക്കരും എണ്ണൂറോളം ഈഴവരും ബാക്കി​ കുടുംബി​, ധീവര, പട്ടി​കജാതി​ വി​ഭാഗക്കാരുമാണ്. ഇവിടം വഖഫ് ഭൂമിയായി പ്രഖ്യാപിച്ച് കൊച്ചി തഹസിൽദാർക്ക് വഖഫ് ബോർഡ് കത്തു നൽകിയ ശേഷം 2022 മുതൽ ഭൂനികുതി സ്വീകരിക്കാതായതോടെ പ്രശ്നങ്ങൾ തുടങ്ങി​. ഹൈക്കോടതി സിംഗിൾബെഞ്ച് കരം സ്വീകരിക്കാൻ വിധിച്ചെങ്കിലും ഡിവിഷൻ ബെഞ്ച് സ്റ്റേ ചെയ്തു. ഇതുമായി ബന്ധപ്പെട്ട ആറു കേസുകൾ ഹൈക്കോടതി മുമ്പാകെയുണ്ട്. കരം മുടങ്ങി​യതോടെ ഭൂമി​ പണയം വയ്ക്കാനോ കെട്ടി​ടം പണി​യാനോ സാധി​ക്കി​ല്ല. വി​ദ്യാഭ്യാസ, ചി​കി​ത്സാ, തൊഴി​ൽ, വി​വാഹ ആവശ്യങ്ങൾക്ക് പണയം വയ്ക്കാനാകാത്തതോടെ നി​രവധി​ പേർ പ്രതി​സന്ധി​യി​ലാണ്.

വി.എസ്. സർക്കാർ നിയോഗിച്ച എം.എ.നിസാർ കമ്മിഷന്റെ നിർദ്ദേശപ്രകാരം,​ 2010-ലെ സർക്കാർ ഉത്തരവ് അനുസരിച്ചാണ് മുനമ്പത്തേത് വഖഫ് സ്വത്താണെന്നും കരം സ്വീകരിക്കരുതെന്നും ആവശ്യപ്പെട്ട് കത്തി നൽകിയത്.- അഡ്വ. ബി​.എം.ജമാൽ, മുൻ സി​.ഇ.ഒ., കേരള വഖഫ് ബോർഡ്.

മുനമ്പത്തുകാരുടെ പൂർവികർ വിലയ്ക്കു വാങ്ങിയതും അവർ ജനിച്ചു വളർന്നതുമായ മണ്ണിൽ ജീവിക്കാനുള്ള അവകാശം നിഷേധിക്കുന്നത് വേദനാജനകമാണ്.- ബിഷപ്പ് ഡോ.പോൾആന്റണി മുല്ലശ്ശേരി, ചെയർമാൻ കെ.സി.ബി.സി ഫാമിലി കമ്മിഷൻ

മുനമ്പത്തുള്ള ഭൂമി കുടികിടപ്പുകാരുടേതാണ്. കുടികിടപ്പ് 1957ൽ കേരള സർക്കാർ നിയമം മൂലം നിരോധിച്ചിട്ടുള്ളതാണ്. ഇവരെ ഇറക്കി വിടാനാകില്ല. -അഡ്വ. കെ.എൻ.രാജൻ ബാബു, ലീഗൽ അഡൈ്വസർ, എസ്.എൻ.ഡി.പി യോഗം