സമ്മാനാർഹമായ ലോട്ടറി ടിക്കറ്റുകൾ യാത്രാമദ്ധ്യേ നഷ്ടപ്പെട്ടു,​ എടത്വ സ്വദേശിയുടെ ബാഗിൽ പണവും

ആലപ്പുഴ: സമ്മാനർഹമായ ലോട്ടറി ടിക്കറ്റുകളും പണവുമടങ്ങിയ ബാഗ് യാത്രാമദ്ധ്യേ നഷ്ടമായതായി പരാതി. ലോട്ടറി ഏജന്റ് എടത്വ ചെക്കിടിക്കാട് വേലേ പറമ്പിൽ അലക്സാണ്ടറിന്റെ ബാഗാണ് ജീവനക്കാരനായ സാമിൽ നിന്ന് നഷ്ടപ്പെട്ടത്. വളഞ്ഞവഴിക്കും തകഴി പച്ചയ്ക്കുമിടയിലായാണ് ബാഗ് നഷ്ടപ്പെട്ടത്. ഇരുചക്രവാഹനത്തിൽ യാത്ര ചെയ്തിരുന്ന സാം ലോട്ടറി ടിക്കറ്റുകളടങ്ങിയ ബാഗ് അരയിൽ കെട്ടിയിരിക്കുകയായിരുന്നു.

വളഞ്ഞവഴിയിൽ എത്തിയപ്പോഴാണ് ബാഗ് നഷ്ടപ്പെട്ട വിവരമറിയുന്നത്. സമ്മാനാർഹമായ 5,​03,​063 രൂപയുടെ വിവിധ ലോട്ടറി ടിക്കറ്റുകളും ടിക്കറ്റെടുക്കാനായി കരുതിയിരുന്ന 50,​850 രൂപയുമാണ് ബാഗിലുണ്ടായിരുന്നത്. ഇത് സംബന്ധിച്ച് ജില്ലാ പൊലീസ് മേധാവി ,​ അമ്പലപ്പുഴ പൊലീസ് എന്നിവർക്ക് പരാതി നൽകി.