ഇനി വട്ടത്തിലിരുന്ന് കൂട്ടായി പഠിക്കാം

തൃശൂർ: ഫ്രണ്ട് ബെഞ്ചില്ല. ബാക്ക് ബെഞ്ചുമില്ല. എല്ലാവരും മുൻനിരയിൽ. അർദ്ധവൃത്താകൃതിയിൽ വിദ്യാർത്ഥികളെ ഇരുത്തി പഠിപ്പിക്കുന്ന പുതുരീതി വൈറലാവുന്നു. പിൻ ബെഞ്ചിലിരുന്നുള്ള തരികിടകളും നടക്കില്ല. ഓരോരുത്തരിലും അദ്ധ്യാപകരുടെ കണ്ണെത്തും. കഴിഞ്ഞവർഷം പുറത്തിറങ്ങിയ 'സ്താനാർത്തി ശ്രീക്കുട്ടൻ" എന്ന സിനിമയിലൂടെയാണ് ഈരീതി ചർച്ചയായത്. ക്ലാസ് മുറിയുടെ വലിപ്പം,​ കുട്ടികളുടെ എണ്ണം എന്നിവ പരിഗണിച്ച്,​ വിഷയത്തെക്കുറിച്ച് പഠിച്ചതിനുശേഷം തീരുമാനമെടുക്കുമെന്ന് പൊതുവിദ്യാഭ്യാസ ഡയറക്ടർ എസ്.ഷാനവാസ് പറഞ്ഞു. വിപ്ലാവത്മകമായ ആശയമാണിതെന്ന് മുൻ ഡി.ജി.പി ഋഷിരാജ് സിംഗ് സമൂഹ മാദ്ധ്യമത്തിൽ കുറിച്ചു. 'ബാക്ക് ബെഞ്ചേഴ്‌സ്" എന്നുള്ള അനാവശ്യ ഇകഴ്ത്തലുകൾ വിദ്യാർത്ഥികളുടെ ജീവിതത്തെയും പഠനനിലവാരത്തെയും ബാധിക്കുന്നത് തടയാൻ ഇതിലൂടെ സാധിക്കുമെന്നാണ് കരുതുന്നത്.

 വടക്കാഞ്ചേരി ഈസ്റ്റ് മങ്ങാട് മോഡൽ

വടക്കാഞ്ചേരി ഈസ്റ്റ് മങ്ങാട് ആർ.സി.സി എൽ.പി സ്‌കൂൾ എല്ലാ ക്ലാസും ഈ രീതിയിലാക്കി. ഒന്നുമുതൽ അഞ്ചാം ക്ലാസ് വരെ ഏഴു ഡിവിഷനുണ്ട്. നാല്, അഞ്ച് ക്ലാസുകളിൽ രണ്ടു ഡിവിഷൻ വീതം. എൽ.കെ.ജി, യു.കെ.ജി ക്ലാസുമുണ്ട്. ഇരുപതിനും മുപ്പതിനും ഇടയിലാണ് ഓരാേ ക്ലാസിലുമുള്ള വിദ്യാർത്ഥികൾ. സംസ്ഥാനത്തെ മറ്റു ചില സ്‌കൂളുകളിലും ഇത് നടപ്പാക്കിയിട്ടുണ്ട്.

 ഇങ്ങനെ ബെഞ്ചുകളിട്ടപ്പോൾ പഠിക്കാൻ എളുപ്പമായി. ടീച്ചർമാർ പറയുന്നത് കേൾക്കാനും നോട്ട് എഴുതാനും കഴിയുന്നുണ്ട്.

-വി.ജെ.ഏയ്ഞ്ചൽ, അഞ്ചാം ക്ലാസ് വിദ്യാർത്ഥി,

ആർ.സി.സി.എൽ.പി സ്‌കൂൾ

 കഴിഞ്ഞമാസം മുതലാണ് ഈ രീതി നടപ്പാക്കിയത്. ഇത് കുട്ടികളുടെ പഠനനിലവാരത്തിൽ വലിയ മാറ്റമുണ്ടാക്കിയതായാണ് മനസിലാകുന്നത്.

-ലിജി, പ്രഥമ അദ്ധ്യാപിക