കൈയിൽ ചുറ്റി; മൂർഖനെ കടിച്ചുകൊന്ന് ഒരു വയസുകാരൻ

പാട്ന: ബീഹാറിൽ വീടിനടുത്ത് കളിച്ചുകൊണ്ടിരിക്കെ കൈയിൽ മൂർഖൻ പാമ്പ് ചുറ്റി. പിന്നാലെ ഒന്നരവയസുകാരൻ പാമ്പിനെ കടിച്ചുകൊന്നു. നിലവിൽ കുട്ടിയുടെ ആരോഗ്യനില തൃപ്തികരമാണെന്ന് ഡോക്ടർമാർ അറിയിച്ചു. ബേട്ടിയ ഗ്രാമത്തിൽ വെള്ളിയാഴ്ചയാണ് സംഭവം. ഗോവിന്ദ എന്ന കുട്ടിയുടെ അടുത്തേക്ക് പാമ്പ് ഇഴഞ്ഞെത്തി കൈയിൽ ചുറ്റുകയായിരുന്നു. കളിപ്പാട്ടം കൊണ്ട് കുട്ടി പാമ്പിനെ അടിക്കുകയും പിന്നാലെ കടിക്കുകയുമായിരുന്നു. പാമ്പ് തത്ക്ഷണം ചത്തു. ശബ്ദം കേൾക്കാതെ വന്നതോടെ വീട്ടുകാർ നോക്കിയപ്പോൾ കുട്ടി അബോധാവസ്ഥയിലായിരുന്നു. ഉടനെ പ്രാഥമിക ചികിത്സാ കേന്ദ്രത്തിലെത്തിച്ചു. ആരോഗ്യനില വഷളായതോടെ ബേട്ടിയയിലെ സർക്കാർ മെഡിക്കൽ കോളേജ് ആശുപത്രിയിലേക്ക് മാറ്റി. കുട്ടി നിരീക്ഷണത്തിൽ കഴിയുകയാണ്.