കോളേജ് വിദ്യാർത്ഥികൾ സഞ്ചരിച്ച കാർ അമിതവേഗത്തിൽ, സ്‌കൂട്ടറുകളിൽ ഇടിച്ചു; പാലായിൽ യുവതികൾക്ക് ദാരുണാന്ത്യം 

കോട്ടയം: പാലായിൽ കാറും സ്‌കൂട്ടറുകളും കൂട്ടിയിടിച്ച് രണ്ട് പേർ മരിച്ചു. പാലാ പ്രവിത്താനം അല്ലപ്പാറ പാലക്കുഴക്കുന്നേൽ സുനിലിന്റെ ഭാര്യ ജോമോൾ (35), മേലുകാവ് നല്ലംകുഴിയിൽ സന്തോഷിന്റെ ഭാര്യ ധന്യ (38) എന്നിവരാണ് മരിച്ചത്. ഇന്ന് രാവിലെ ഒമ്പതരയോടെയാണ് അപകടമുണ്ടായത്. അമിതവേഗത്തിലെത്തിയ കാർ ഇരുസ്‌കൂട്ടറുകളെയും ഇടിച്ചുതെറിപ്പിക്കുകയായിരുന്നു. ശേഷം കാർ മതിലിൽ ഇടിച്ചാണ് നിന്നത്. അപകടത്തിൽ ജോമോളുടെ ഏകമകൾക്ക് ഗുരുതരമായി പരിക്കേറ്റിട്ടുണ്ട്. കുട്ടി പാലായിലെ സ്വകാര്യ ആശുപത്രിയിൽ ചികിത്സയിലാണ്.

പാലായിലെ സ്വകാര്യ ബിഎഡ് കോളേജിലെ നാല് വിദ്യാർത്ഥികളായിരുന്നു കാറിലെ യാത്രക്കാർ. ഇവർ ബിഎഡ് പരിശീലനത്തിനായി രാമപുരം ഭാഗത്തേക്ക് പോകുകയായിരുന്നു. സ്‌കൂട്ടർ യാത്രക്കാർ തൊടുപുഴ ഭാഗത്ത് നിന്ന് പാലായിലേക്ക് പോകുകയായിരുന്നു. കാറിൽ ഓടിച്ചയാൾക്ക് ഡ്രൈവിംഗ് ലൈസൻസുണ്ടെന്ന് പൊലീസ് അറിയിച്ചു. ഇവരുടെ വൈദ്യപരിശോധന നടത്തും. കാർ അമിത വേഗത്തിലായിരുന്നെന്നും ഇതാണ് അപകടത്തിന് കാരണമെന്നും പൊലീസ് സ്ഥിരീകരിച്ചു. പരിക്കേറ്റ 12 വയസുകാരി പാലാ സെന്റ് മേരീസ് സ്‌കൂളിൽ ആറാം ക്ലാസ് വിദ്യാർത്ഥിയാണ്.