അംബാനിയോ അദാനിയോ അല്ല, നമ്പർ പ്ലേറ്റിനായി ഏറ്റവും കൂടുതൽ പണം മുടക്കിയത് മലയാളി; തുക കേട്ടാൽ അമ്പരക്കും

ശതകോടീശ്വരനായ മുകേഷ് അംബാനിയും കുടുംബവും എപ്പോഴും വാർത്തകളിൽ ഇടംപിടിക്കാറുണ്ട്. മുകേഷിന്റെയും ഭാര്യ നിത അംബാനിയുടെയും മക്കളായ ഇഷ അംബാനിയുടെയും അനന്ദ് അംബാനിയുടെയും ആകാശ് അംബാനിയുടെയുമൊക്കെ അത്യാംഡംബര പൂർണമായ ജീവിതമാണ് ഇതിന് കാരണം. ലോകത്തെ തന്നെ ഏറ്റവും വലിയ ആഡംബര വിവാഹങ്ങളിലൊന്നായിരുന്നു അനന്ദ് അംബാനിയുടേത്. വാഹനങ്ങളുടെ വലിയൊരു ശേഖരവും കുടുംബത്തിനുണ്ട്.

ലക്ഷ്വറി കാറുകൾ സ്വന്തമാക്കുകയെന്നത് മാത്രമല്ല, അതിന് 'വി ഐ പി' നമ്പർ പ്ലേറ്റ് സ്വന്തമാക്കാനും മുകേഷ് അംബാനി ശ്രമിക്കാറുണ്ട്. ഇതിനായി ഇഷ്ടം പോലെ പണവും അദ്ദേഹം ചെലവഴിക്കാറുണ്ട്. എന്നാൽ രാജ്യത്ത് നമ്പർ പ്ലേറ്റിനായി ഏറ്റവും അധികം പണം മുടക്കിയ വ്യക്തി മുകേഷ് അംബാനിയല്ല. പിന്നെ ആരാണ് ഗൗതം ആദാനിയാണോയെന്നായിരിക്കും പലരും ചോദിക്കുക.

എന്നാൽ അംബാനിയോ അദാനിയോ അല്ല, അതൊരു മലയാളിയാണ് എന്നാണ് ഒരു ദേശീയ മാദ്ധ്യമം റിപ്പോർട്ട് ചെയ്യുന്നത്. ഒരു ടെക് കമ്പനി സിഇഒ ആയ വേണു ഗോപാലകൃഷ്ണനാണ് രാജ്യത്തെ ഏറ്റവും വിലയേറിയ നമ്പർ പ്ലേറ്റിന്റെ ഉടമയെന്നാണ് റിപ്പോർട്ടുകൾ സൂചിപ്പിക്കുന്നത്.

കാക്കനാട് ഇൻഫോപാർക്കിലെ ലിറ്റ്മസ് 7 സിസ്റ്റംസ് കൺസൽറ്റിംഗ് കമ്പനി സി ഇ ഒയാണ് വേണു ഗോപാലകൃഷ്ണൻ. അടുത്തിടെ അദ്ദേഹം തന്റെ കാർ ശേഖരത്തിലേക്ക് ഒരു പുതിയ ആഡംബര കാർ കൂടി കൊണ്ടുവന്നു. ഏകദേശം നാല് കോടി രൂപ വിലയുള്ള ലംബോർഗിനി ഉറുസ് പെർഫോമാനേറ്റാണ് അദ്ദേഹം സ്വന്തമാക്കിയത്. എന്നാൽ എല്ലാവരുടെയും ശ്രദ്ധ പിടിച്ചുപറ്റിയത് കാറല്ല, മറിച്ച് നമ്പർ പ്ലേറ്റാണ്.

KL 07 DG 0007 ആണ് അദ്ദേഹം ലേലത്തിലൂടെ സ്വന്തമാക്കിയത്. മാദ്ധ്യമ റിപ്പോർട്ടുകൾ ശരിയാണെങ്കിൽ, രാജ്യത്ത് ഇതുവരെയുള്ള ഏറ്റവും വിലയേറിയ നമ്പർ പ്ലേറ്റാണിത്. 45.99 ലക്ഷം രൂപയ്‌ക്കാണ് ഈ സവിശേഷ നമ്പർ പ്ലേറ്റ് അദ്ദേഹം സ്വന്തമാക്കിയത്. ഇളം പച്ച നിറത്തിലുള്ള ലംബോർഗിനി ഉറുസ് പെർഫോമാനേറ്റിന്റെ കേരളത്തിലെ ആദ്യത്തെ കാറാണിതെന്നാണ്‌ വിവരം.

2025 ഏപ്രിൽ ഏഴിനാണ് കേരള മോട്ടോർ വാഹന വകുപ്പ് ഓൺലൈൻ ലേലം നടത്തിയത്. ആ ലേലത്തിൽ വച്ചാണ് കാർ പ്രേമികളുടെ പ്രിയപ്പെട്ട നമ്പരായ 007 അദ്ദേഹം സ്വന്തമാക്കിയത്. ഈ നമ്പറിനായുള്ള ലേലം 25,000 രൂപയിലായിരുന്നു ആരംഭിച്ചത്. ആവശ്യക്കാരേറിയതോടെ തുക അമ്പത് ലക്ഷത്തോടടുത്തെത്തുകയായിരുന്നു.

'ലേലം നടക്കുന്ന ദിവസം ഞാൻ ന്യൂസിലൻഡിലായിരുന്നു. എട്ട് ലക്ഷം രൂപ റേഞ്ചിൽ കിട്ടിയാൽ ലേലത്തിൽ പിടിക്കണമെന്ന് കമ്പനിയുടെ ഫിനാൻസ് വിഭാഗത്തിൽ ഏൽപ്പിച്ചിരുന്നു. എന്നാൽ പിന്നീട് ഫോണിന്റെ നെറ്റ്‌വർക്ക് കിട്ടയപ്പോൾ 18 ലക്ഷത്തിലെത്തി. എതിർഭാഗത്തുള്ളവർ ഓരോ മിനിറ്റിലും കൂട്ടുകയാണ്. എന്നാൽ പിന്നെ നമുക്ക് തന്നെ പിടിക്കണമെന്ന് അവരോട് പറഞ്ഞു. പിന്നെ വിളിച്ചപ്പോഴാണ് 46 ലക്ഷമായെന്ന് അറഞ്ഞത്. രാജ്യത്തെ ഏറ്റവും വിലയേറിയ നമ്പർ പ്ലേറ്റാണിതെന്ന് പിന്നീടാണ് മനസിലായത്.'- അദ്ദേഹം ഒരു മാദ്ധ്യമത്തോട് പറഞ്ഞു.

ഇതുമാത്രമല്ല ലംബോർഗിനി, ബിഎംഡബ്ല്യു ബൈക്ക് എന്നിവയുൾപ്പെടെ നിരവധി ആഡംബര വാഹനങ്ങൾ വേണു ഗോപാലകൃഷ്ണന്റെ ഗ്യാരേജിലുണ്ട്. 16 കോടിയുടെ റോൾസ് റോയ്സ് ബ്ലാക്ക് ബാഡ്ജ്‌ഗോസ്റ്റ് സീരിസ് രാജ്യത്ത് ആദ്യം വാങ്ങിയ ആളാണ് അദ്ദേഹമെന്ന് പറയപ്പെടുന്നു.