അടുക്കളപ്പുറം പാലത്തിനടിയിലെ പാഴ്ത്തടികളും മാലിന്യങ്ങളും നീക്കി

ചെന്നിത്തല: ഒന്നര മാസത്തിലേറെയായി പാലത്തിന്റെ തൂണുകളിൽ കുടുങ്ങിക്കിടന്ന മുളങ്കൂട്ടങ്ങളും പാഴ്തടികളും ഉൾപ്പെടെയുള്ള മാലിന്യങ്ങൾ നീക്കം ചെയ്തു. ചെന്നിത്തല - തൃപ്പെരുന്തുറ പഞ്ചായത്ത് 17, 18 വാർഡുകളെ ബന്ധിപ്പിച്ച് അച്ചൻകോവിലാറിന് കുറുകെയുള്ള കാങ്കേരിൽ അടുക്കളപ്പുറം ആംബുലൻസ് പാലത്തിന്റെ തൂണുകളിലാണ് മാലിന്യങ്ങൾ അടിഞ്ഞ് കൂടിയിരുന്നത്. പ്രദേശവാസികളുടെ ഈ ദുരിതാവസ്ഥ കേരളകൗമുദി നേരത്തെ റിപ്പോർട്ട് ചെയ്തിരുന്നു. 1999ൽ നിർമിച്ച പാലത്തിന്റെ തൂണുകൾ കാലപ്പഴക്കത്താൽ ദ്രവിച്ചു തുരുമ്പെടുത്ത് ഏതുനിമിഷവും നിലംപൊത്താവുന്ന അവസ്ഥയിലായിരുന്നു. ഈ തൂണുകളിലാണ് വലിയ തടിയുൾപ്പെടെ തങ്ങിനിന്നത്. നാട്ടുകാർക്ക് പുറംലോകത്തേക്കു പോകുന്നതിനുള്ള ഏകമാർഗമാണ് ഈ പാലം. കിഴക്കൻ വെള്ളത്തിന്റെ വരവിൽ ഇവ അച്ചൻകോവിലാറ്റിലൂടെ ഒഴുകിയെത്തിയിട്ട് മൂന്ന് മാസമായിട്ടും നീക്കം ചെയ്യാത്തതിനെതിരെ നാട്ടുകാർ പ്രതിഷേധത്തിലായിരുന്നു. 6ന് പുത്തനാറ്റിലെ വാഴക്കൂട്ടം കടവിൽ നടക്കേണ്ട ചെന്നിത്തല സന്തോഷ് ട്രോഫി ജലോത്സവ നടത്തിപ്പിനു ഇത് തടസമാകുമെന്നു കാട്ടി ജലോത്സവ സമിതിയും പരാതിയുമായി രംഗത്തെത്തിയിരുന്നു.

...............

# 4 ദിവസം കൊണ്ട് മാലിന്യം നീക്കം ചെയ്തു

മേജർ ഇറിഗേഷൻ വകുപ്പ് എക്സിക്യൂ ട്ടീവ് എൻജിനീയർ പി.എസ്.വിനോദ്, അസി.എൻജിനീയർ സി.ജ്യോതി എന്നിവരിടപ്പെട്ടതിനെ തുടർന്ന്, 4 ദിവസം കൊണ്ടു മാലിന്യം പൂർണമായും നീക്കംചെയ്തു നീരൊഴുക്കു സുഗമമാക്കുകയായിരുന്നു. ഇവ നീക്കം ചെയ്യുന്നതിനു മേജർ ഇറിഗേഷൻ വകുപ്പ് 38,000 രൂപയുടെ ടെൻഡർ ക്ഷണിച്ചിരുന്നു. ടെൻഡർ പലതവണ ആവർത്തിച്ചിട്ടും തുക കുറവായതിനാൽ ആരും ഏറ്റെടുക്കാതിരുന്നതാണ് മാലിന്യ നീക്കം നീണ്ടു പോയത്.