ഇലക്ട്രിക് വാഹന വിപണിയിലേക്ക് വിൻഫാസ്‌റ്റ്

കൊച്ചി: ആഗോള മേഖലയിലെ പ്രമുഖ വാഹന നിർമ്മാതാക്കളായ വിൻഫാസ്റ്റ് പ്രീമിയം ഇലക്ട്രിക് എസ്‌.യു.വികളായ വി.എഫ് 6, വി.എഫ് 7 എന്നിവ ഇന്ത്യയിൽ ഔദ്യോഗികമായി പുറത്തിറക്കി. തമിഴ്‌നാട്ടിലെ തൂത്തുക്കുടിയിലുള്ള അത്യാധുനിക നിർമ്മാണ കേന്ദ്രത്തിൽ അസംബിൾ ചെയ്ത ഇരു മോഡലുകളും അതിവേഗം വളരുന്ന ഇന്ത്യയിലെ ഇലക്ട്രിക് വാഹന വിപണിയിലേക്ക് വിൻഫാസ്റ്റ് അവതരിപ്പിക്കും. സുസ്ഥിരവും പരിസ്ഥിതി സൗഹൃദവുമായ ഗതാഗത സംവിധാനത്തിലേക്കുള്ള ഇന്ത്യയുടെ മാറ്റത്തെ പിന്തുണയ്ക്കുന്നതിൽ കമ്പനിക്കുള്ള ശക്തമായ പ്രതിബദ്ധതയെ ഊട്ടിയുറപ്പിക്കുന്നതാണ് മെയ്ഡ് ഇൻ ഇന്ത്യ പ്രീമിയം ഇലക്ട്രിക് എസ്‌.യു.വികളെന്ന് വിൻഫാസ്റ്റ് വക്താവ് പറഞ്ഞു.

സവിശേഷതകൾ

59.6 കെ.ഡബ്ല്യു.എച്ച് ബാറ്ററി പായ്ക്ക് വാഗ്ദാനം ചെയ്യുന്ന ഈ മോഡൽ 25 മിനിറ്റിനുള്ളിൽ ഫാസ്റ്റ് ചാർജിംഗും (10-70%) എ.ആർ.എ.ഐ സാക്ഷ്യപ്പെടുത്തിയ 468 കിലോമീറ്റർ വരെ റേഞ്ചും ഉറപ്പുനൽകുന്നു. 2,730 എം.എം വീൽബേസും 190 എം.എം ഗ്രൗണ്ട് ക്ലിയറൻസും ഇന്ത്യൻ ഉപഭോക്താക്കൾക്ക് അനുയോജ്യമാണ്. രണ്ട് ഇന്റീരിയർ ട്രിം നിറങ്ങളിലും എർത്ത്, വിൻഡ്, വിൻഡ് ഇൻഫിനിറ്റി എന്നിങ്ങനെ മൂന്ന് വേരിയന്റുകളിലും വി.എഫ് 6 പ്രീമിയം എസ്‌.യു.വി ലഭ്യമാകും.

വലുപ്പം

4.5 മീറ്ററിൽ കൂടുതൽ നീളവും 2,840 എം.എം വീൽബേസുമുള്ള വലിയ എസ്‌.യു.വിയായ വി.എഫ് 7, പ്രപഞ്ചം വ്യത്യസ്തമാണ് എന്ന ഡിസൈൻ തത്ത്വചിന്തയെയാണ് ഉൾക്കൊള്ളുന്നത്. രണ്ട് ബാറ്ററി പായ്ക്കുകളിലും എർത്ത്, വിൻഡ്, വിൻഡ് ഇൻഫിനിറ്റി, സ്‌കൈ, സ്‌കൈ ഇൻഫിനിറ്റി എന്നിങ്ങനെ അഞ്ച് വേരിയന്റുകളിലും ലഭ്യമാകും. രണ്ട് ഇന്റീരിയർ കളർ ഓപ്ഷനുകളും, രണ്ട് (എഫ്.‌ഡബ്ല്യു.ഡി, എ.ഡബ്ല്യു.ഡി) ഡ്രൈവ് ട്രെയിൻ ഓപ്ഷനുകളും കാറിനുണ്ട്.

ആഗോള വിപണിയിലെ താരം

അമേരിക്ക, കാനഡ, യൂറോപ്പ്, ഫിലിപ്പീൻസ്, ഇന്തോനേഷ്യ, മിഡിൽ ഈസ്റ്റ് എന്നിവിടങ്ങളിലെ വിപണികളിൽ വിജയം നേടിയ വിൻഫാസ്റ്റ് വിപുലമായ അന്താരാഷ്ട്ര അനുഭവവുമായാണ് ഇന്ത്യയിലെത്തുന്നത്.