എഫ്ഐആർ കിട്ടാൻ ഇനി പൊലീസ് സ്റ്റേഷൻ കയറിയിറങ്ങേണ്ട ! ചെയ്യേണ്ടത് ഇത്രമാത്രം

തിരുവനന്തപുരം : പൊലീസ് രജിസ്റ്റർ ചെയ്ത കേസുകളുടെ എഫ്.ഐ.ആറിന്റെ പകർപ്പ് ഇനി പോലീസ് സ്റ്റേഷനിൽ പോകാതെ തന്നെ ലഭിക്കും. കേരള പൊലീസിന്റെ ഔദ്യോഗിക ആപ്പായ പോൽ ആപ്പ് വഴി ഇനി എഫ്.ഐ.ആർ ഡൗൺലോഡ് ചെയ്യാനുള്ള സൗകര്യം സജ്ജമാണ്. ഇത് കേരള പൊലീസിന്റെ വെബ്സൈറ്റിലും തുണ വെബ് പോർട്ടലിലും ലഭ്യമാകുമെന്നും ഫേസ്ബുക്ക് പോസ്റ്റിൽ അവർ അറിയിച്ചു.

ലൈംഗികാതിക്രമവുമായി ബന്ധപ്പെട്ട് സ്ത്രീകളുടെയും കുട്ടികളുടെയും പേര് നിയമപരമായി വെളിപ്പെടുത്താൻ കഴിയാത്ത കേസുകൾ ഒഴികെയുള്ള എല്ലാത്തരം കേസുകളുടെയും എഫ്.ഐ.ആർ ഡൗൺലോഡ് ചെയ്തെടുക്കാം. രാജ്യദ്രോഹവുമായി ബന്ധപ്പെട്ട കേസുകളിലെ എഫ്.ഐ.ആർ ഓൺലൈനായി ലഭ്യമാകില്ല. എഫ്.ഐ.ആറിന്റെ പകർപ്പ് ഡൗൺലോഡ് ചെയ്യുന്നതിനായി പോൽ ആപ്പ് ഇൻസ്റ്റാൾ ചെയ്‌തതിനുശേഷം മൊബൈൽ നമ്പർ ഉപയോഗിച്ച് രജിസ്റ്റർ ചെയ്യുക. എഫ്.ഐ.ആർ ഡൗൺലോഡ് ഓപ്ഷനിൽ എഫ്.ഐ.ആർ നമ്പർ, കേസ് രജിസ്റ്റർ ചെയ്ത വർഷം, പൊലീസ് ജില്ല, പൊലീസ് സ്റ്റേഷന്റെ പേര് എന്നിവ നൽകി സെർച്ച് ചെയ്യാവുന്നതാണ്. എഫ്.ഐ.ആർ നമ്പർ അറിയില്ലെങ്കിൽ സ്റ്റാർട്ടിങ് ഡേറ്റ്, എൻഡിങ് ഡേറ്റ് സെലക്ട് ചെയ്ത് നൽകിയാൽ ആ കാലയളവിൽ രജിസ്റ്റർ ചെയ്ത കേസുകളുടെ ലിസ്റ്റ് ലഭിക്കും. അതിൽ നിന്ന് ആവശ്യമായ എഫ്.ഐ.ആർ ഡൗൺലോഡ് ചെയ്യാം. ഇതിലെ QR കോഡ് സ്കാൻ ചെയ്ത് എഫ്‌.ഐ.ആറിൻ്റെ ആധികാരികത ഉറപ്പ് വരുത്താമെന്നും പൊലീസ് അറിയിച്ചു.