താനൂരിൽ മത്സ്യത്തൊഴിലാളിയുടെ വലയിൽ കുടുങ്ങിയത് അഞ്ച് കിലോ ഭാരമുള്ള രണ്ട് നാഗ വിഗ്രഹങ്ങൾ, മോഷണം പോയതെന്ന് സംശയം

മലപ്പുറം: മത്സ്യബന്ധനത്തിനിടെ വലയിൽ കുരുങ്ങിയത് അഞ്ച് കിലോയോളം വരുന്ന നാഗവിഗ്രഹങ്ങൾ. മലപ്പുറം താനൂർ ഉണ്ണ്യാൽ അഴീക്കൽ കടലിലാണ് സംഭവം. പുതിയ കടപ്പുറം ചക്കാച്ചന്റെ പുരയ്‌ക്കൽ റസലിന്റെ വലയിലാണ് മത്സ്യബന്ധനത്തിനിടെ വിഗ്രഹങ്ങൾ കണ്ടെത്തിയത്.

പിച്ചളയിൽ നിർമ്മിച്ച നാഗ വിഗ്രഹങ്ങളാണിവ. ഏകദേശം അഞ്ച് കിലോ ഭാരം വരും. ഇവ താനൂർ പൊലീസിനെ ഏൽപ്പിച്ചു. വിഗ്രഹങ്ങൾ ഏതെങ്കിലും ക്ഷേത്രത്തിൽ നിന്നും മോഷണം പോയതാണോ എന്നൊരു സംശയം പൊലീസിനുണ്ട്. ഇക്കാര്യം അന്വേഷിക്കും. സംഭവത്തെക്കുറിച്ച് സമഗ്രമായ വിവരം ശേഖരിച്ചുവരികയാണ് പൊലീസ്.