ഡ്രൈ ഡേയിൽ മദ്യ വില്പന, യുവാവ് പിടിയിൽ

കൊല്ലം: ഡ്രൈ ഡേയിൽ വിൽപ്പന നടത്തുന്നതിനായി വീട്ടിൽ സൂക്ഷിച്ചിരുന്ന 30 ലിറ്റർ വിദേശ മദ്യവുമായി യുവാവ് പിടിയിൽ. കുപ്പണ സ്വദേശിയായ ആനന്ദിനെയാണ് കൊല്ലം എക്സൈസ് സ്പെഷ്യൽ സ്ക്വാഡ് അസിസ്റ്റന്റ് എക്സൈസ് ഇൻസ്പെക്ടർ ജി.ശ്രീകുമാറിന്റെ നേതൃത്വത്തിലുള്ള സംഘം അറസ്റ്റ് ചെയ്തത്. വീട്ടിൽ സൂക്ഷിച്ചിരുന്ന അര ലിറ്റർ മദ്യത്തിന്റെ 60 കുപ്പികളാണ് പിടിച്ചെടുത്തത്. ഡ്രൈ ഡേകളിൽ സ്ഥിരമായി മദ്യ വില്പന നടത്തിയിരുന്ന ആനന്ദിനെ കഴിഞ്ഞ കുറേ നാളായി എക്സൈസ് സംഘം നിരീക്ഷിച്ചുവരികയായിരുന്നു. കുപ്പണ, അഞ്ചാലുംമൂട്, കടവൂർ, താന്നിക്കമുക്ക് ഭാഗങ്ങളിലായിരുന്നു മദ്യ വില്പന. ഫോണിൽ ബന്ധപ്പെടുന്നവർക്കാണ് മദ്യം എത്തിച്ച് നൽകിയിരുന്നത്. പ്രിവന്റീവ് ഓഫീസർ സുനിൽ ജോസ്, സിവിൽ എക്സൈസ് ഓഫീസർമാരായ ലാൽ, അനീഷ്, ജോജോ, ബാലു.എസ്.സുന്ദർ, തൻസീർ അസീസ്, വനിത സിവിൽ എക്സൈസ് ഓഫീസർ നിജി എന്നിവർ റെയ്ഡിൽ പങ്കെടുത്തു.