കോളേജ് വിദ്യാർത്ഥിനികളെ പവർഫുള്ളാക്കാൻ മാസ്റ്റർപ്ലാൻ

ആലപ്പുഴ: കോളേജ് വിദ്യാർത്ഥിനികളിൽ ദിശാബോധം സൃഷ്ടിക്കാൻ വിമൻ പവ‌ർലൈഫ് മാസ്റ്റർ പ്ലാനുമായി കുടുംബശ്രീ. ഓരോ വിദ്യാർത്ഥിനിക്കും സ്വന്തം കഴിവുകളും താത്പര്യങ്ങളും തിരിച്ചറിഞ്ഞ് അനുയോജ്യമായ ലൈഫ് പ്ളാൻ തയ്യാറാക്കുന്നതിനാവശ്യമായ പിന്തുണ നൽകുകയെന്നതാണ് പദ്ധതി ലക്ഷ്യം.

ഇതിലൂടെ വിദ്യാർത്ഥിനികൾക്ക് കരിയറിൽ വളർച്ചയും സാമ്പത്തികമായി സ്വയംപര്യാപ്തതയും കൈവരിക്കാൻ അവസരം ലഭ്യമാകും. കേരളത്തിലെ കോളേജുകളിലും സർവകലാശാലകളിലും പഠിക്കുന്ന പെൺകുട്ടികളാണ് പദ്ധതി ഗുണഭോക്താക്കൾ. ഒരോ ജില്ലയിലെയും ഒരുകോളേജിൽ വീതം ആദ്യഘട്ടത്തിൽ പദ്ധതി നടപ്പാക്കും.ജില്ലയിൽ ആലപ്പുഴ എസ്.ഡി കോളേജിനെയാണ് തിരഞ്ഞെടുത്തിരിക്കുന്നത്. ബിരുദാനന്തര ബിരുദമടക്കം ഉന്നത വിദ്യാഭ്യാസം നേടിയ യുവതികൾ ധാരാളമുണ്ടെങ്കിലും അതിനുസൃതായി തൊഴിൽ പങ്കാളിത്തം ഉണ്ടാകുന്നില്ല. ഇതിന്റെ അടിസ്ഥാനത്തിലാണ് കുടുംബശ്രീ 'വിമൻ പവർലൈഫ് മാസ്റ്റർ പ്ളാൻ' നടപ്പാക്കുന്നത്.

കുടുംബശ്രീയുടെ പുത്തൻ പദ്ധതി

1.നൈപുണ്യ വികസനം നേടുന്നതിനും ഭാവി പദ്ധതികൾ തയ്യാറാക്കുന്നതിനുമുള്ള പിന്തുണ പദ്ധതി വഴി ലഭ്യമാക്കുകയും പെൺകുട്ടികൾക്ക് അനുയോജ്യമായ തൊഴിൽ മേഖല കണ്ടെത്തി വരുമാനം നേടാനുള്ള സഹായം നൽകുകയും ചെയ്യും. ലിംഗസമത്വം ഉറപ്പു വരുത്തുന്ന തൊഴിൽ പരിസ്ഥിതി രൂപപ്പെടുത്തും

2.ഓരോ വിദ്യാർത്ഥിനിയുടെയും പഠന, പാഠ്യേതര മികവുകൾ,വെല്ലുവിളികൾ എന്നിവ സംബന്ധിച്ച് ക്യാമ്പസ് തലത്തിൽ അതത് കോളേജുകളിലെ അദ്ധ്യാപകരുടെ നേതൃത്വത്തിൽ വിവരശേഖരണവും വിശകലനവും നടത്തും.കരിയർ കൗൺസലിംഗ്, മെന്ററിംഗ് എന്നിവ ഉൾപ്പെടെ പരിശീലന പരിപാടികൾ സംഘടിപ്പിക്കും

3.ഓരോ വിദ്യാർത്ഥിനിക്കും അനുയോജ്യമായ വ്യക്തിഗത ലൈഫ് മാസ്റ്റർ പ്ളാൻ തയ്യാറാക്കുന്നതിനൊപ്പം കുടുംബശ്രീ, കേന്ദ്രസംസ്ഥാന സർക്കാർ പദ്ധതികളുമായി ഇവരെ ബന്ധിപ്പിക്കും.നേതൃത്വ വികസനപരിശീലനം, ശില്പശാലകൾ,വിവിധ ക്യാമ്പയിനുകൾ എന്നിവയുടെ ഭാഗമാക്കുകയും ചെയ്യും

തുടക്കം ഒരുജില്ലയിൽ ഒരുകോളേജിൽ

ഗവ.സംസ്‌കൃത കോളേജ് (തിരുവനന്തപുരം), ബേബി മെമ്മോറിയൽ ഗവ. കോളേജ് (ചവറ, കൊല്ലം), എം.എം.എൻ.എസ്.എസ് കോളേജ് (കോന്നി, പത്തനംതിട്ട), എസ്.ഡി കോളേജ് (ആലപ്പുഴ), ഗവ. കോളേജ് (നാട്ടകം, കോട്ടയം), മരിയൻ കോളേജ് (കുട്ടിക്കാനം, ഇടുക്കി), മഹാരാജാസ് കോളേജ് (എറണാകുളം), സെന്റ് തോമസ് കോളേജ് (തൃശൂർ),നേതാജി മെമ്മോറിയൽ ആർട്‌സ് ആൻഡ് സയൻസ് കോളേജ് (നെൻമാറ, പാലക്കാട്), തുഞ്ചത്തെഴുത്തച്ഛൻ മലയാളം സർവകലാശാല (തിരൂർ, മലപ്പുറം), ഗവ. ആർട്‌സ് ആൻഡ് സയൻസ് കോളേജ് (മീഞ്ചന്ത, കോഴിക്കോട്), ഡോൺ ബോസ്‌കോ കോളേജ് (സുൽത്താൻ ബത്തേരി, വയനാട്), ഡോൺ ബോസ്‌കോ കോളേജ് (അങ്ങാടിക്കടവ്, കണ്ണൂർ), ഗവൺമെന്റ് കോളേജ് (കാസർകോട്).