മണ്ണിറ വെള്ളച്ചാട്ടം: കെട്ടിടം പണി പൂർത്തിയാകുന്നു

കോന്നി: മണ്ണീറ വെള്ളച്ചാട്ടത്തിലേക്ക് സഞ്ചാരികളെ ആകർഷിക്കാനുള്ള പദ്ധതിയുടെ ഭാഗമായി കെട്ടിട സമുച്ചയ നിർമ്മാണം പൂർത്തിയാകുന്നു. ബ്ലോക്ക് പഞ്ചായത്ത് അതുമ്പുംകുളം ഡിവിഷനിലാണ് തണ്ണിത്തോട് മണ്ണീറ വെള്ളച്ചാട്ടം . കോന്നി ബ്ലോക്ക് പഞ്ചായത്ത് 2021- 22, 2022 -23 വാർഷിക പദ്ധതികളിലായി 15,18,100 ലക്ഷം രൂപ വകയിരുത്തിയ ആദ്യഘട്ട പ്രവർത്തനങ്ങളാണ് പൂർത്തിയാകുന്നത്. ടൊയ്ലറ്റുകൾ, വസ്ത്രം മാറുന്നതിനുള്ള മുറി, ക്ലോക്ക് റൂം, ലഘുഭക്ഷണശാല, കവാടം എന്നിവയാണ് ആദ്യഘട്ടമായി പൂർത്തീകരിക്കുന്നത്. രണ്ടാം ഘട്ടമായി മുകൾനിലയിൽ വിശ്രമകേന്ദ്രം, വ്യൂ പോയിന്റ് വൈദ്യുതീകരണം, എന്നിവയ്ക്ക് 19,04,000 ലക്ഷം രൂപ 2024-25 വാർഷിക പദ്ധതിയിൽ ഉൾപ്പെടുത്തി നിർമ്മാണം ആരംഭിച്ചു.

തണ്ണിത്തോട് ഗ്രാമ പഞ്ചായത്ത് പ്രസിഡന്റ് ഷാജി കെ ശമുവേൽ, ബ്ലോക്ക് പഞ്ചായത്ത് ഡിവിഷൻ അംഗം പ്രവീൺ പ്ലാവിളയിൽ, തണ്ണിത്തോട് ഗ്രാമ പഞ്ചായത്ത് ക്ഷേമകാര്യ സ്ഥിരം സമിതി അംഗം പ്രീത പി.എസ്, ബ്ലോക്ക് പഞ്ചായത്ത് അസിസ്റ്റന്റ് എൻജിനീയർ ശ്രീജ കുഞ്ഞമ്മ, ഓവർസിയർ ശ്രീകുമാർ, എന്നിവർ സ്ഥലം സന്ദർശിച്ച് പ്രവർത്തനം വിലയിരുത്തി. ബിജു മാത്യു, ഷിജോ ഇഞ്ചക്കാടൻ എന്നിവരും ഒപ്പം ഉണ്ടായിരുന്നു.