പോക്സോ കേസ് : 70 വയസുകാരന് 23 വർഷം കഠിനതടവും 80,000 രൂപ പിഴയും ശിക്ഷ

ചാവക്കാട് : 11 വയസുകാരിയെ ലൈംഗികമായി അതിക്രമം നടത്തിയ 70 വയസുകാരന് 23 വർഷം കഠിനതടവും, എൺപതിനായിരം രൂപ പിഴയും ശിക്ഷ വിധിച്ച് ചാവക്കാട് ഫാസ്റ്റ് ട്രാക്ക് സ്‌പെഷ്യൽ കോടതി. ചാവക്കാട് തിരുവത്ര ഇ.എം.എസ് നഗർ റമളാൻ വീട്ടിൽ ഹുസൈൻ മകൻ മൊയ്തു റമളാൻ (70) എന്നയാളെയാണ് ജഡ്ജി എസ്.ലിഷ ശിക്ഷ വിധിച്ചത്.
പെൺകുട്ടിയെ 2021 ഓണം വെക്കേഷൻ മുതൽ 2023 മാർച്ച് വരെയുള്ള കാലയളവിൽ പല ദിവസങ്ങളിൽ ലൈംഗികാതിക്രമം നടത്തുകയായിരുന്നു. മൊബൈലിൽ വീഡിയോസ് കാട്ടിയും പീഡനവിവരം പറയാതിരിക്കാൻ പാരിതോഷികമായി പണം നൽകിയുമായിരുന്നു പീഡനം. പിഴ അടയ്ക്കാത്ത പക്ഷം ഒരു വർഷവും 4 മാസവും കൂടി അധിക തടവ് അനുഭവിക്കണം. ചാവക്കാട് പൊലീസ് സ്റ്റേഷനിൽ വിവരം അറിഞ്ഞതിനെ തുടർന്ന് സി.പി.ഒ എ.പ്രസീത കുട്ടിയുടെ മൊഴി രേഖപ്പെടുത്തി ഹാജരാക്കിയതിന്റെ അടിസ്ഥാനത്തിൽ എസ്.ഐ ബിബിൻ ബി.നായർ എഫ്.ഐ.ആർ രജിസ്റ്റർ ചെയ്ത് കേസ് അന്വേഷണം പൂർത്തിയാക്കി കുറ്റപത്രം സമർപ്പിച്ചു. പ്രോസിക്യൂഷനായി സ്‌പെഷ്യൽ പബ്ലിക് പ്രോസിക്യൂട്ടർ അഡ്വ.സിജു മുട്ടത്ത്, അഡ്വ.സി.നിഷ എന്നിവർ ഹാജരായി.