സി.പി.എം സ്ഥാനാർത്ഥി പട്ടികയിൽ ക്രിമിനലുകൾ: വി.ഡി സതീശൻ

കാസർകോട്: സി.പി.എം സ്ഥാനാർത്ഥി പട്ടികയിൽ ലഹരിമാഫിയ ബന്ധമുള്ളവരും ലൈംഗിക കേസുകളിലെ പ്രതികളും ഉൾപ്പെടെയുള്ള ക്രിമിനലുകളാണെന്ന് പ്രതിപക്ഷ നേതാവ് വി.ഡി സതീശൻ. കാസർകോട് പ്രസ് ക്ലബ്ബ് സംഘടിപ്പിച്ച തദ്ദേശീയം മീറ്റ് ദ പ്രസ് പരിപാടിയിൽ സംസാരിക്കുകയായിരുന്നു അദ്ദേഹം.

അരിയിൽ ഷുക്കൂർ വധക്കേസിൽ 28ാം പ്രതിയായിരുന്ന പി.പി സുരേശൻ പട്ടുവും പഞ്ചായത്തിൽ സ്ഥാനാർത്ഥിയാണ്. ഫസൽ വധക്കേസിലെ പ്രതിയായ കാരായി ചന്ദ്രശേഖരനും സ്ഥാനാർത്ഥിയാണ്. പൊലീസിനെ ബോംബ് എറിഞ്ഞ് കൊല്ലാൻ ശ്രമിച്ച കേസിൽ 20 വർഷത്തെ തടവ് ശിക്ഷയ്ക്ക് വിധിച്ച നേതാവും ലഹരിക്കടത്തുമായി ബന്ധപ്പെട്ട് സി.പി.എം പുറത്താക്കിയ ഷാനവാസും സ്ഥാനാർത്ഥിയാണ്. കേരളത്തിലെ ലഹരി മാഫിയകൾക്ക് രാഷ്ട്രീയ രക്ഷാകർതൃത്വം ഉണ്ടെന്ന പ്രതിപക്ഷ ആരോപണം ശരിവയ്ക്കുന്നതാണ് ഷാനവാസിന്റെ സ്ഥാനാർത്ഥിത്വം. പെൺകുട്ടിയോട് മോശമായി പെരുമാറിയതിന് പുറത്തായ പ്രദീപൻ കരിവെള്ളൂരിൽ സ്ഥാനാർത്ഥിയാണ്. നവീൻ ബാബുവിന്റെ മരണവുമായി ബന്ധപ്പെട്ട് പി.പി ദിവ്യയ്‌ക്കെതിരെ അന്വേഷണം നടത്തിയ പൊലീസ് എ.സി.പി രത്നകുമാർ സർവീസിൽ നിന്നും വിരമിച്ചതിനു പിന്നാലെ ശ്രീകണ്ഠാപുരത്ത് സ്ഥാനാർത്ഥിയാണ്. ഇതിലൂടെ സി.പി.എം പൊതുസമൂഹത്തിന് തെറ്റായ സന്ദേശമാണ് നൽകുന്നതെന്ന് സതീശൻ പറഞ്ഞു.

ബി.ജെ.പി വേട്ടിനു വേണ്ടിയാണോ സി.പി.എം നേതാക്കൾ പാർട്ടി ചിഹ്നം ഉപേക്ഷിച്ച് മത്സരിക്കുന്നത്. ശബരിമല സ്വർണക്കൊള്ള തിരഞ്ഞെടുപ്പ് അജണ്ടയിൽ നിന്നും ഒഴിവാക്കുമെന്നു കരുതേണ്ട. തദ്ദേശ തിരഞ്ഞെടുപ്പിൽ ഉറച്ച പ്രതീക്ഷകളോടെയാണ് യു.ഡി.എഫ് മുന്നോട്ടു പോകുന്നത്. പത്ത് ദിവസം മുൻപ് സർക്കാരിനെതിരെ സമർപ്പിച്ച കുറ്റപത്രം ജനങ്ങളുടെ കേടതിയിൽ വിചാരണ ചെയ്യപ്പെടും. യു.ഡി.എഫ് അധികാരത്തിൽ എത്തിയാൽ എന്തു ചെയ്യുമെന്ന് വ്യക്തമാക്കുന്ന പ്രകടനപത്രികയും പുറത്തിറക്കി.

പണ്ട് സി.പി.എമ്മിന് റിബലുകളുണ്ടായിരുന്നില്ല. ഇപ്പോൾ സംസ്ഥാനത്ത് ഉടനീളെ സി.പി.എമ്മിന് റിബലുകളാണ്. എ.കെ.ജി സെന്ററിന്റെ മൂക്കിനുതാഴെ പോലും റിബൽ സ്ഥാനാർത്ഥികളുണ്ടെന്ന് വി.ഡി സതീശൻ പറഞ്ഞു.

കാസർകോടിന് അവഗണന

കാസർകോടിന് വേണ്ടി പ്രഖ്യാപിച്ച 300 കോടിയുടെ പാക്കേജിൽ ചെലവഴിച്ചത് 28 കോടി മാത്രം; ജില്ലയുടെ പിന്നാക്കാവസ്ഥ പരിഹരിക്കുന്നതിനു വേണ്ടി പാക്കേജ് പ്രഖ്യാപിച്ചിട്ട് അതിന്റെ പത്തു ശതമാനം പോലും ചെലവഴിക്കാനായിട്ടില്ല. ആരോഗ്യ വിദ്യാഭ്യാസ മേഖലകളിൽ ഉൾപ്പെടെ പിന്നാക്കം നിൽക്കുന്ന ജില്ലയാണ് കാസർകോട്. എൻഡോസൾഫാൻ ദുരിത ബാധിതരെ അവഗണിച്ചുവെന്നും സതീശൻ കുറ്റപ്പെടുത്തി.