ചെങ്ങന്നൂർ ഡിപ്പോയിലെ ടോയ്ലെറ്റ് മുറിയിൽ തെന്നിവീണ് തീർത്ഥാടകന് പരിക്ക്

ചെങ്ങന്നൂർ: ചെങ്ങന്നൂർ കെ.എസ്.ആർ.ടി.സി ഡിപ്പോയിലെ ടോയ്ലെറ്റ് മുറി വൃത്തിഹീനമെന്ന് പരാതി. ദുർഗന്ധവും ചെളിയും കാരണം കാലെടുത്തു വയ്ക്കാൻ പറ്റാത്ത സ്ഥിതിയാണ്. മണ്ഡലകാലം തുടങ്ങി നിരവധി തീർത്ഥാടകർ വന്നുപോകുന്ന ബസ് സ്റ്റാൻഡിനാണ് ഈ ദുർഗതി. കഴിഞ്ഞ ദിവസം ടോയ്ലറ്റിൽ പോയ തീർത്ഥാടകൻ തെന്നി വീണ് ഗുരുതര പരിക്കേറ്റിരുന്നു. സ്റ്റാൻഡിൽ മൂന്ന് ക്ലീനിംഗ് തൊഴിലാളികൾ ഉണ്ടെങ്കിലും രണ്ട് പേരെ ഓഫീസിന്റെ മറ്റ് ആവശ്യങ്ങൾക്കായി വിനിയോഗിക്കുന്നതോടെ ടോയ്ലെറ്റിന്റെ ചുമതല ഒരാൾക്ക് മാത്രമാണ് . ശബരിമല തീർത്ഥാടനകാലത്ത് വലിയ തിരക്കാണ് ഇവിടെ അനുഭവപ്പെടുന്നത്. ഒരേയൊരു തൊഴിലാളിയെ ആശ്രയിച്ചുള്ള ശുചിത്വനടപടികൾ പര്യാപ്തമല്ലാതെ വന്നതോടെ ടോയ്ലെറ്റിൽ കയറാൻ പറ്റാത്ത സ്ഥിതിയാണ്. മണ്ഡലകാലം അവസാനിക്കുന്നതിന് മുമ്പ് ശുചിമുറികളുടെ അടിസ്ഥാന സൗകര്യങ്ങൾ പുനഃക്രമീകരിച്ച് പ്രശ്നങ്ങൾ പരിഹരിക്കപ്പെടുമെന്ന പ്രതീക്ഷയിലാണ് യാത്രക്കാരും തീർത്ഥാടകരും.